रियाधमध्ये भारतीय वारशाचे प्रदर्शन

रियाधमध्ये भारतीय वारशाचे प्रदर्शन

म. टा. प्रतिनिधी, नागपूर

सौदी अरब येथील रियाध येथे होणाऱ्या जगप्रसिद्ध जनादरिया मेळाव्यात यंदा भारताच्या वारशाचे प्रदर्शन होणार आहे. देशातील पुरातन इस्लामी खत्तातीचे (सुलेखन कला) प्रदर्शन यंदा केले जाणार आहे. नागपुरातील पुरालेखांचे तज्ज्ञ आणि भारतीय पुरातत्त्व विभागातून निवृत्त झालेले डॉ. जी. एस. ख्वाजा यांच्या नेतृत्वात हे प्रदर्शन सादर करण्यात येणार आहे.

सौदी अरब येथे दरवर्षी जनादरिया येथे मेळावा आयोजित केला जातो. यात विविध देशांचा वारसा (संस्कृती, साहित्य) सादर केले जाते. यंदा ही संधी भारताला देण्यात आली आहे. भारतीय परराष्ट्र मंत्रालयातर्फे उत्तर प्रदेशातील रामपूर रजा वाचनालयातील संरक्षित इस्लामी सुलेखन कलेचे दुर्मीळ नमुने या प्रदर्शनाकरिता पाठविण्यात येणार आहेत. ख्वाजा हे पुरालेख विषयाचे तज्ज्ञ असल्याने त्यांच्या नेतृत्वात हे प्रदर्शन सादर केले जाणार आहे. रियाध येथे ७ ते २२ फेब्रुवारीदरम्यान हे प्रदर्शन आयोजित करण्यात आले आहे.