म.टा. प्रतिनिधी, नागपूर
परस्पर पैसे हडपल्याने संतप्त झालेल्या शिवसेनेच्या पदाधिकाऱ्याने साथीदाराच्या मदतीने ट्रकचालकाला अर्धनग्न करून अमानुष मारहाण केली. या घटनेचा व्हीडिओ रविवारी सोशल मीडियावर व्हायरला झाला. या घटनेची गंभीर दखल घेत वाडी पोलिसांनी दोघांविरुद्ध हत्येच्या प्रयत्नाचा गुन्हा दाखल केला. अमित साहेबराव ठाकरे (रा. कळमेश्वर) व अखिल भाऊराव पोहनकर (रा. दत्तवाडी), असे गुन्हा दाखल करण्यात आलेल्यांची नावे आहे. विक्की सुनील आगलावे (वय २३, रा.कळमेश्वर), असे जखमी ट्रकचालकाचे नाव आहे. अखिल हा शिवसेनेचा पदाधिकारी असल्याची माहिती वाडी पोलिसांनी दिली.
पोलिसांनी दिलेल्या माहितीनुसार, वडधामनातील आंध्रा-कर्नाटक रोडलाइन्स या ट्रान्सपोर्ट एजन्सीकडे विक्की हा चालक आहे. काही दिवसांपूर्वी या एजन्सीने विक्की याला ट्रकमधील साहित्य थिरुअनंतपुरम येथे पोहोचविण्यास सांगितले. यासाठी विक्की याला ३५ हजार रुपये दिले. परंतु विक्की हा ट्रक घेऊन थिरुअनंतपुरमला गेला नाही. तो नागपुरातच होता. त्याने सर्व पैसे खर्च केले. याशिवाय ट्रकमधील १२ हजार रुपयांचे डिझेलही परस्पर विकले. त्यानंतर विक्की हा बेपत्ता झाला. शनिवारी तो वडधामना भागात फिरत होता. अखिल व अमित या दोघांनी त्याला पकडले. एजन्सीच्या कार्यालयात आणून त्याला अर्धनग्न केले. पंख्याला लटकवून विक्की याला अमानुष मारहाण केली. याचदरम्यान कोणीतरी या घटनेचा मोबाइलमध्ये व्हीडिओ काढला. रविवारी हा व्हीडिओ व्हायरला झाला. पोलिस आयुक्त डॉ. भूषणकुमार उपाध्याय यांनी या घटनेची गंभीर दखल घेत मारहाण करणाऱ्यांविरुद्ध हत्येच्या प्रयत्नाचा गुन्हा दाखल करण्याचे निर्देश दिले. त्यानंतर वाडी पोलिसांनी दोघांविरुद्ध हत्येच्या प्रयत्नाचा गुन्हा दाखल करुन तपास सुरु केला. वृत्त लिहिपर्यंत दोघांना अटक करण्यात आली नव्हती.