राहुल गांधी यांच्या सभेसाठी शेगावची पाहणी

नागपूर : काँग्रेस नेते राहुल गांधी यांच्या भारत जोडो पदयात्रेनिमित्त राज्यातील पक्षाचे नेते आज, शनिवारपासून महाराष्ट्रातील मार्गाची पाहणी करणार आहेत. प्रदेशने शेगाव येथे सभा घेण्याची मागणी दिल्लीत केली असल्याने सभेबाबत विचार केला जात आहे.

विधीमंडळ पक्षनेते बाळासाहेब थोरात, माजी मुख्यमंत्री अशोक चव्हाण, माजी मंत्री डॉ. नितीन राऊत, यशोमती ठाकूर, शिवाजीराव मोघे, आरिफ नसीम खान, चंद्रकांत हंडोरे, प्रदेश सहप्रभारी आशिष दुआ, संपतकुमार व सोनल पटेल यांची टीम नांदेड जिल्ह्यातील देगलुरपासून दौरा करणार आहेत. हिंगोली, वाशीम, अकोला, शेगाव आदी ठिकाणी पक्षाची टीम भेट देऊन मार्ग व सभा स्थळाची पाहणी करतील.

राहुल गांधी यांच्या पदयात्रेत शेगावचा समावेश नव्हता. संतनगरीत सभा व्हावी, यासाठी बाळासाहेब थोरात यांनी पुढाकार घेतल्यानंतर अखिल भारतीय समितीकडे निवेदन पाठवण्यात आले. या मार्गाची पाहणी केली जाणार आहे. यानंतर शेगावच्या सभेचा निर्णय होईल.