नागपूर : मध्य प्रदेशातील परासियापासून ते धुळ्यापर्यंत धुडगूस घालणाऱ्या चोरट्यांच्या आंतरराज्यीय टोळीतील दोघांना गिट्टीखदान पोलिसांनी सिनेस्टाइल सापळा रचून अटक केली. या टोळीतील अन्य दोघांच्या शोधासाठी पोलिसांचे पथक धुळे येथे गेले आहे. बिरेनसिंग रामकेवलसिंग ठाकूर (वय ३५) व नीरज सिंग (वय ३०, दोन्ही रा. चांदामेठ, परासिया) अशी अटकेतील चोरट्यांची नावे आहेत. ही टोळी मित्राची कार घेऊन परासिया येथून निघत होती. नागपुरातील निर्जनस्थळी असलेल्या घरात ते घरफोडी करायचे. त्यानंतर ते अमरावती, अकोला, नाशिक, धुळे येथे घरफोडी करायचे. या टोळीतील दोघे त्यांना धुळे येथे मदत करीत होते. धुळे येथे घरफोडी केल्यानंतर परत ही टोळी कारने परासिया येथे जात होती. गिट्टीखदान पोलिस स्टेशनचे निरीक्षक विनोद चौधरी यांच्या मार्गदर्शनाखाली उपनिरीक्षक साजिद अहमद, हेडकॉन्स्टेबल मजहर खान, शिपाई सूरज थोटे, राजेश दुबे, रोशन नांदेकर, धमेंद्र मिश्रा, संतोष पटले, इशांत आटे हे रात्रगस्त घालत होते. गोरेवाडा भागात त्यांना कार संशयास्पद स्थितीत दिसली. पोलिसांनी सापळा रचून दोघांना अटक केली. चौकशीदरम्यान दोघांनी साथीदारांच्या मदतीने गायत्री सुमन सिंग यांच्याकडे चोरी केल्याचे सांगितले. पोलिसांनी त्यांच्याकडून गिट्टीखदानमधील दोन घरफोड्या उघडकीस आणून कार, घरफोडीचे साहित्य व रोख रकमेसह चांदीचा ऐवज जप्त केला. दोघांचीही तीन दिवस पोलिस कोठडी घेण्यात आली आहे.
आंतरराज्यीय टोळी पोलिसांचा जाळ्यात
मध्य प्रदेशातील परासियापासून ते धुळ्यापर्यंत धुडगूस घालणाऱ्या चोरट्यांच्या आंतरराज्यीय टोळीतील दोघांना गिट्टीखदान पोलिसांनी सिनेस्टाइल सापळा रचून ...
Maharashtra Times 16 Sep 2018, 4:00 am