सरसंघचालक डॉ. भागवतांच्या हस्ते उद्घाटन
म.टा. प्रतिनिधी, नागपूर
साउथ पॉइंट स्कूलतर्फे सातव्या आंतरराष्ट्रीय प्राचार्य शिक्षण परिषदेचे आयोजन मंगळवार, १९ नोव्हेंबरपासून सिव्हिल लाइन्समधील चिटणवीस सेंटर येथे करण्यात आले आहे. या तीनदिवसीय परिषदेचे उद्घाटन राष्ट्रीय स्वयंसेवक संघाचे सरसंघचालक डॉ. मोहन भागवत यांच्या हस्ते होणार आहे.
चौदा वर्षांत सातव्यांदा आंतरराष्ट्रीय प्राचार्य शिक्षण परिषदेचे आयोजन करण्यात येत आहे. यापूर्वी परिषदेत राष्ट्रपती ए.पी.जे. अब्दुल कलाम आणि बऱ्याच नामवंत व्यक्तींनी परिषदेत प्रमुख अतिथी म्हणून उपस्थिती दर्शविली आहे. आंतरराष्ट्रीय परिषदेचे उद्घाटन मंगळवारी सकाळी ९ वाजता सरसंघचालक डॉ. मोहन भागवत यांच्या हस्ते करण्यात येईल. यावेळी 'सुपर-३०'चे आनंदकुमार, परिषदेचे आयोजक सनफ्लॉवर अॅण्ड तायची पब्लिकेशनचे राजेश घई, साउथ पाइंट स्कूलचे संचालक देवेन दस्तुरे प्रामुख्याने उपस्थित राहतील. 'थोर व्यक्तींच्या निर्मितीत शाळेचे योगदान' या संकल्पनेवर आधारित परिषदेच्या उद्घाटन सत्रानंतर ११.३० वाजता आनंदकुमार प्राचार्यांशी संवाद साधतील. यानंतर पेपर प्रेझेंटेशन करण्यात येईल.
बुधवार, २० नोव्हेंबर रोजी सकाळी ९ वाजता ग्रॅमी अवार्ड विजेते पं. विश्वमोहन भट्ट हे 'इम्पॉर्टन्स ऑफ द म्युजिक एक्सलन्स' तर 'द म्युजिक पाथ टू लँग्वेज मॅथेमॅटिक्स अॅण्ड बीयॉण्ड' या विषयावर सी. पी. विश्वनाथ विचार व्यक्त करतील. याशिवाय, परिषदेत चित्रपट कथालेखक तेजस देऊस्कर, सिंगापूर येथील सुधीर पाठक प्राचार्यांना संबोधित करतील.
समारोपीय कार्यक्रम गुरुवार, २१ नोव्हेंबर रोजी सकाळी १० वाजता सिव्हिल लाइन्समधील डॉ. वसंतराव देशपांडे सभागृहात आयोजित करण्यात आला आहे. याप्रसंगी प्रमुख अतिथी म्हणून वायुसेनेचे माजी उपप्रमुख शिरीष देव उपस्थित राहतील. आनंद कुमार आणि सोनम वांगचूक यांना 'नचिकेता सर्वोत्तम' तर सेवानिवृत्त प्राचार्या नीरू कपाई आणि मुक्ता चॅटर्जी यांना 'नचिकेता आजीवन' पुरस्काराने सन्मानित केले जाणार आहे.