म.टा. प्रतिनिधी, नागपूर
म्हाळगीनगर येथे वसविण्यात आलेल्या अवैध पसाऱ्यावर नागपूर सुधार प्रन्यासच्या पथकाने शक्रवारी कारवाई केली. चिकन सेंटरचे शेड आणि पिंजरे जप्त करण्यात आले.
म्हाळगीनगर येथील नागरिकांनी नागपूर सुधार प्रन्यासकडे याबाबत तक्रारी केल्या होत्या. परिसरात उभ्या झालेल्या या अवैध साम्राज्यामुळे नागरिकांना अनेक अडचणींचा सामना करावा लागत होता. नागरिकांच्या तक्रारीची दखल घेत नासुप्र आणि महापालिका यांच्या संयुक्त विद्यमाने हे अतिक्रमण हटविण्यात आले. नासुप्रचे अधीक्षक अभियंता सुनील गुज्जेलवार यांच्या मार्गदर्शनाखाली नासुप्रचे दक्षिण विभागीय अधिकारी अविनाश बडगे, सहायक अभियंता संदीप राऊत, स्थापत्य अभियांत्रिकी सहायक विनोद खळगे, अतिक्रमण विरोधी पथकाचे प्रमुख मनोहर पाटील आणि मनपाचे अशोक पाटील यांच्या पथकाने ही कारवाई केली. यावेळी हुडकेश्वर पोलिसांचा चोख बंदोबस्त होता.