म. टा. क्रीडा प्रतिनिधी, नागपूर
जिल्हा क्रीडा अधिकारी कार्यालयाच्या वतीने घेण्यात आलेल्या आंतरशालेय तायक्वांडो स्पर्धेत अजनीच्या माऊंट कार्मेल गर्ल्स हायस्कूलची सातव्या वर्गातील विद्यार्थिनी इशिता फेंडरने सुवर्णपदक पटकावले. १४ वर्षांखालील मुलींच्या २९ ते ३२ किलो वजनगटात शाळेचे प्रतिनिधित्व करत ही कामगिरी केली. आहुजानगरातील डॉ. बाबासाहेब आंबेडकर क्रीडा संकुलात ही स्पर्धा घेण्यात आली. प्रशिक्षक प्रवीण धांडे यांच्या मार्गदर्शनाखाली इशिता नियमित सराव करते. या यशाबद्दल शाळेच्या मुख्याध्यापिका, क्रीडा प्रशिक्षक, आई-वडील यांनी इशिताचे अभिनंदन केले आहे.
.................
तालुकास्तरीय योगासन स्पर्धा २५ सप्टेंबरला
म. टा. क्रीडा प्रतिनिधी, नागपूर
काटोल तालुका योग असोसिएशनच्या वतीने तालुकास्तरीय योगासन स्पर्धेचे आयोजन २५ सप्टेंबरला सकाळी १० वाजता काटोल येथील लक्ष्मीनगरातील महालक्ष्मी सभागृहात करण्यात आले आहे. या स्पर्धेतून नागपुरात होणाऱ्या जिल्हास्तरीय योगासन स्पर्धेकरता योगपटूंच्या संघाची निवड करण्यात येईल. स्पर्धा ८ ते १३, १३ ते १८, १८ ते २५, २५ ते ३५, ३५ ते ५० आणि ५० च्या पुढे अशा वयोगटात मुले, मुली, पुरुष व महिला विभागात घेण्यात येईल. या स्पर्धेच्या अधिक माहितीसाठी इच्छुकांनी सोनाली काकडे- पाटील यांच्याशी (९८८१३१८५५०) या क्रमांकावर संपर्क साधावा.