म. टा. प्रतिनिधी, नागपूर
जिल्हा परिषदेसोबतच जिल्ह्यातील १३ पैकी ८ पंचायत समित्यांवरसुद्धा काँग्रेसने बहुमत प्राप्त केले होते. या पंचायत समित्यांवर काँग्रेसचे सभापती तसेच उपसभापतींची निवड होण्याची औपचारिकता शुक्रवारी पार पडली. केवळ कामठीत 'टाय' झाल्याने ईश्वरचिठ्ठीने सभापती आणि उपसभापतींची निवड करण्यात आली. यात सभापतींची ईश्वरचिठ्ठी भाजपच्या तर उपसभापतींची काँग्रेसच्या बाजूने लागली. भाजपचे उमेश रडके यांच्या गळ्यात सभापतिपदाची माळ पडली.
जिल्हा परिषदेसोबतच पंचायत समित्यांच्या निवडणुकांचेही निकाल अलीकडेच जाहीर झाले. त्यात एकूण ११६ जागांपैकी सर्वाधिक ५९ जागा मिळवित पहिली पसंती काँग्रेसला मिळाली होती. सोबतच १३ पैकी ८ पंचायत समितींवर बहुमताचा जादुई आकडा पार केला होता. राष्ट्रÑवादी काँग्रेसकडे तीन, तर भाजपकडे एक पंचायत समिती आली होती. काँग्रेसने कळमेश्वर, सावनेर, उमरेड या तीन पंचायत समित्यांमध्ये शत-प्रतिशत जागा मिळविल्या होत्या. याखेरीज पारशिवनी, नागपूर ग्रामीण, भिवापूर, मौदा व रामटेकमध्येसुद्धा काँग्रेसला स्पष्ट बहुमत होते. राष्ट्रवादी काँग्रेसने गृहक्षेत्र असलेल्या नरखेड, काटोल आणि हिंगणा पंचायत समितींवर बहुमत मिळविले. जिल्हा परिषद आणि पंचायत समिती निवडणुकीत भाजपचा दारुण पराभव झाला आहे. त्यामुळे एकंदरीतच ग्रामीण भागात भाजपची पिछेहाट झाल्याचे चित्र दिसून येत आहे.
भाजपकडे दोन पंचायत समिती
भाजपला केवळ कुही पंचायत समितीवर बहुमताने कब्जा करण्यात यश आले आहे. कामठी पंचायत समितीच्या निवडणुकीत ईश्वरचिठ्ठीने सभापतिपदी भाजपचे उमेश रडके, तर उपसभापतिपदी काँग्रेसचे आशिष मलेवार विजयी झालेत. या पंचायत समितीमध्ये एकूण ८ सदस्य संख्या होती. मतदानात दोन्ही पदांसाठी प्रत्येकी चार मते पडल्याने दोन्ही पदांसाठी 'टाय' झाला. त्यामुळे या निवडणुकीचा निकाल ईश्वरचिठ्ठीने काढण्याचा निर्णय झाला. कामठी पंचायत समितीच्या सभापतीची निवड पंचायत समिती सभागृहात पीठासीन अधिकारी उपजिल्हाधिकारी आशा पठाण व साहायक निवडणूक निर्णय अधिकारी गट विकास अधिकारी सचिन सूर्यवंशी यांच्या उपस्थितीत ईश्वरचिठ्ठी काढण्यात आली. सेंट जोसेफ स्कूलमधील इयत्ता चौथीतील विद्यार्थिनी तनीषा गिरासे या नऊ वर्षीय मुलीच्या हाताने ही ईश्वरचिठ्ठी काढण्यात आली.
पं.स. सभापती उपसभापती
उमरेड रमेश पिलकाळे (काँग्रेस) सुरेश लेंडे (काँग्रेस)
नागपूर ग्रामीण रेखा वरठी (काँग्रेस) संजय चिकटे (राष्ट्रवादी)
मौदा दुर्गा ठवकर (काँग्रेस) श्रीहरी थोटे (शिवसेना)
भिवापूर ममता शेंडे (काँग्रेस) कृष्णा घोडेस्वार (काँग्रेस)
हिंगणा बबन आव्हाले (राष्ट्रवादी) सुषमा कावळे (राष्ट्रवादी)
पारशिवनी मीना कावळे (काँग्रेस) चेतन देशमुख (काँग्रेस)
काटोल धर्मपाल खोब्रागडे(राष्ट्रवादी) अनुराधा खराडे(राष्ट्रवादी)
नरखेड नीलिमा रेवतकर (राष्ट्रवादी) वैभव दळवी (राष्ट्रवादी)
कळमेश्वर श्रावण भिंगारे (काँग्रेस) जयश्री वाळके (काँग्रेस)
सावनेर अरुणा शिंदे (काँग्रेस) प्रकाश पराते (काँग्रेस)
रामटेक कला ठाकरे (काँग्रेस) रवींद्र कुमरे (काँग्रेस)
कुही अश्विनी शिवणकर (भाजप) वामन श्रीडामे (भाजप)
कामठी उमेश रडके (भाजप) आशिष मलेवार (काँग्रेस)