म. टा. प्रतिनिधी, नागपूर
नवी दिल्ली येथील जवाहरलाल नेहरू विद्यापीठात सुरू असलेल्या विद्यार्थी संघटनांच्या संघर्षाचे पडसाद नागपूर विद्यापीठातही मंगळवारी उमटले. 'डॉ. बाबासाहेब आंबेडकर विद्यार्थी संघटना' आणि 'अखिल भारतीय विद्यार्थी परिषद' या दोन्हीही संघटनांनी विद्यापीठ परिसरात निदर्शने केली. ही आंदोलने आणि घोषणाबाजी यामुळे विद्यापीठ परिसरात तणाव निर्माण झाला होता.
जेएनयूमधील हल्ल्याच्या निषेधार्थ डॉ. बाबासाहेब आंबेडकर विद्यार्थी संघटनेच्या वतीने नागपूर विद्यापीठाच्या अमरावती मार्गावरील शैक्षणिक परिसरासमोर निदर्शने करून घोषणाबाजी करण्यात आली. जेएनयूमधील हल्ला हा न्याय्य मागण्या करणाऱ्या विद्यार्थ्यांचा आवाज दाबण्याचा प्रयत्न असल्याचा आरोप या संघटनेच्या कार्यकर्त्यांनी केला. या हल्ल्याच्या निषेधार्थ विद्यापीठाच्या शैक्षणिक परिसराच्या आवारात घोषणाबाजी करण्यात आली. अभाविपने केलेल्या कृत्याचा आम्ही निषेध करतो, असे आंबेडकर विद्यार्थी संघटनेचे अध्यक्ष भूषण वाघमारे यांनी सांगितले.
अभाविपचीही निदर्शने
जेएनयूमध्ये डाव्या संघटनांच्या कार्यकर्त्यांनी अभाविपच्या कार्यकर्त्यांवर हल्ला केला. या हल्ल्यात २५ विद्यार्थी, कार्यकर्ते जखमी झाले तसेच १० विद्यार्थी गहाळ झाले आहेत. या घटनेचा निषेध करीत अभाविपच्या कार्यकर्त्यांनी विद्यापीठ परिसरात निदर्शने केली. यावेळी डाव्या विचारसरणीच्या संघटना देशहितविरोधी काम करीत असून अभाविप त्यांचा शक्य त्या सर्व ठिकाणी विरोध करेल, असे अभाविपचे नागपूर महानगर मंत्री अमित पटले आणि आणि कार्यकर्त्या करिमा सिंग यांनी सांगितले.
विद्यापीठातील प्राध्यापकांनीही या आंदोलनात सहभागी व्हावे, असे आवाहन डॉ. बाबासाहेब आंबेडकर संघटनेने केले होते. मात्र, विद्यापीठाच्या शैक्षणिक परिसरातील एकही प्राध्यापक या आंदोलनात सहभागी झाला नाही. दरम्यान, अभाविपने विविध कॉलेजेसमध्ये जाऊन विद्यार्थ्यांना आपली बाजू समजावून सांगण्याचे अभियान सुरू केले आहे. लॉ कॉलेज, सी. पी. अॅण्ड बेरार महाविद्यालय आणि सूर्योदय इंजिनीअरिंग कॉलेज येथे विद्यार्थ्यांशी अभाविप कार्यकर्त्यांनी संवाद साधला.
.....................