‘कास्ट्राइब’वरून पुन्हा वाद

म.टा. प्रतिनिधी, नागपूर

कास्ट्राइब कर्मचारी महासंघाचे अध्यक्ष कृष्णा इंगळे यांनी भरविलेल्या अधिवेशनावरून वेगवेगळ्या नावांनी काम करणाऱ्या कास्ट्राइब संघटनांमध्ये पुन्हा वाद पेटला आहे. हे अधिवेशनच बेकायदेशीर झाले असल्याचा आरोप कास्ट्राइब कर्मचारी कल्याण महासंघाचे अध्यक्ष अरुण गाडे यांनी केला.

कास्ट्राइब कर्मचारी महासंघाचे ३७ व्या वर्षात पदार्पण केल्यानिमित्त वार्षिक अधिवेशन शुक्रवारी खामला चौकातील विजयश्री सभागृहात घेण्यात आले. केंद्रीय समाजकल्याण राज्यमंत्री रामदास आठवले, राज्याचे समाजकल्याणमंत्री राजकुमार बडोले, आंबेडकरी विचारवंत डॉ. मधुकर कासारे, सेवानिवृत्त न्यायाधीश पी. पी. पाटील आदी या अधिवेशनाला उपस्थित होते. हजारो कर्मचाऱ्यांच्या उपस्थितीत घेण्यात आलेल्या या अधिवेशनात संघटनेच्या वाटचालीवर प्रकाश टाकण्यात आला. गेल्या ३६ वर्षात महासंघाने अन्यायग्रस्त कर्मचाऱ्यांचे अनेक प्रश्न सोडविले. शासकिय मागासवर्गीय मुलांचे व मुलींचे वसतिगृह बंद करण्याचा निर्णय शासनास बदलविण्यास भाग पाडले, जिल्हाधिकाऱ्यास मारहाण करणाऱ्या आमदाराच्या निषेधार्ह २ लाख कर्मचाऱ्यांनी मोर्चा काढून निषेध नोंदविला, अशी माहिती कृष्णा इंगळे यांनी सांगितली. या अधिवेशनाच्या निमित्ताने भारतीय महिला संघाचे विश्वकप स्पर्धेत प्रतिनिधित्व करणारी मोना मेश्राम हिला २१ हजारांचा धनादेश देण्यात आला.