टेलरचा मुलगा बनला लखपती

नागपूर: वडिलांचा टेलरींगचा धंदा...घरात दुसरं कमावणारं नाही...त्यामुळे पोटाला चिमटा देऊन संसार चालवणाऱ्या केरळच्या कोल्लममधील फर्नांडिस कुटुंबाने जस्टीनला आयआयएमचं शिक्षण घेण्यासाठी नागपूरला पाठवलं. पोरानंही नाव काढलं... गरिबीची जाणीव ठेवून जस्टीननं जोमानं शिक्षण घेतलं... आज त्याला १९ लाख रुपयांच्या वार्षिक पॅकेजचा जॉब मिळाला असून त्याचं आयुष्यच बदलून गेलं आहे. एवढं मोठं घसघशीत पॅकेज मिळवणारा तो नागपूर आयआयएममधील एकमेव विद्यार्थी ठरला आहे.

शाळेत असताना जस्टीनला दोन वेळचं अन्न मिळणं मुश्किल होतं. मात्र त्याने नेहमीच त्याचं करियर आणि शिक्षणावर लक्ष केंद्रीत केलं. त्याच्या मेहनतीचं फळ त्याला अखेर मिळालं आहे. त्याला हैदराबाद येथील व्हॅल्यू लॅब्स कंपनीत असिस्टंट डायरेक्टरच्या पदाची ऑफर मिळाली आहे. त्यासाठी त्याला वार्षिक १९ लाख रुपयांचं पॅकेज देऊ केलंय. नागपूर आयआयएमच्या विद्यार्थ्याला आतापर्यंत एवढं गलेलठ्ठ पॅकेज मिळालेलं नाही. मात्र जस्टीनने ही करामत करून दाखविली आहे.

टेलरिंगचा धंदा आमचा पिढीजात धंदा आहे. मात्र औद्योगिकीकरणामुळे आम्हाला या धंद्यात खूप मोठं नुकसान सोसावं लागलं. माझे आजोबा टेलर होते. नंतर वडिलांनीही हा वारसा पुढे नेला. मात्र रेडिमेड कपड्यांचा जमाना आला आणि आम्हाला मोठं नुकसान सहन करावं लागलं. त्यामुळे कामं मिळत नव्हती. परिणामी आमची आर्थिक स्थिती वाईट झाली, असं तो म्हणाला. आमची परिस्थिती इतकी हालाखीची झाली की आम्हाला सरकारी रेशनवर दिवस काढावे लागले, असं सांगताना त्याचे डोळे पाणावले.

मात्र शिक्षणामुळेच कुटुंबाचा कायापालट होऊ शकतो, याची जाणीव माझ्या आंटीला होती. त्यामुळे तिने आमच्या शिक्षणावर लक्ष केंद्रीत केलं. माझ्या बहिणीला बारावीपर्यंत शिक्षण दिलं आणि मलाही शिक्षणासाठी प्रोत्साहित केलं, असं तो म्हणाला. त्रिवेंद्रम येथील गव्हर्नमेंट कॉलेज ऑफ इंजीनियरींगमध्ये प्रवेश घेतल्यानंतर स्कॉलरशीपवर त्याने सर्व खर्च भागविला. आयआयएममध्ये येण्यापूर्वी त्याने एका सॉफ्टवेअर कंपनीत दोन वर्ष नोकरीही केली होती.

ही बातमी इंग्रजीत वाचण्यासाठी इथे क्लिक करा: