कुत्रे खाण्यासाठी येतात आणि...
आश्रमातील कुत्र्यांची संख्या सतत बदलते, प्रजनन हंगामही वाढतो असंही त्यांनी सांगितलं. अनेक असे भटके कुत्रे आहेत जे केवळ अन्नासाठी इथपर्यंत पोहोचतात आणि त्यानंतर हे आश्रम कधीही सोडत नाहीत. अनेक कुत्र्यांचा इथेच जन्म झाला आहे. नोकरी करणारे असे लोक आहेत जे त्यांचे पाळलेले कुत्रे इथे सोडतात. तसंच असेही कित्येक जण आहेत जे आता कुत्र्यांना पुढे सांभाळू शकत नाहीत किंवा काळजी घेऊ शकत नाहीत ते लोकही त्यांच्या पाळीव प्राण्याला या आश्रमात सोडतात.
आश्रमात अंदाजे ६० कुत्रे
सध्या आश्रमात अंदाजे ६० कुत्रे आहेत, पण दरवर्षी महिनाभरात ही संख्या शंभरच्या पुढे जाते. नियमानुसार, कुत्रा जिथे बसला आहे तिथून आम्ही त्याला कधीही हाकलून देत नाही, असंही या आश्रमाच्या विश्वस्तांनी सांगितलं. यापैकी एकाही कुत्र्याला नाव दिलेलं नाही, यामागे तसं काही कारणही नाही, असंही म्हणाले. कुणी कुत्र्याला नावाने हाक मारली तरी आमची काही हरकत नसल्याचं त्यांनी सांगितलं.
गुरु परमहंस रामसुंबर बाबा
हे आश्रम, कुत्र्यांसाठी केलं जाणारं हे काम कसं सुरू झालं यावर बोलताना विश्वस्तांनी सांगितलं, की आमचे गुरु परमहंस रामसुंबर बाबा शंभर वर्षांपूर्वी नागपुरात आले. ते याच ठिकाणी आले होते. त्यांनीच हे सुरू केल्याचं सांगण्यात आलं. त्यांनी सर्व भटक्या प्राण्यांना खायला दिलं आणि त्यांच्यात चांगलं नातंही निर्माण झालं. प्राण्यांशी संवाद साधण्याच्या त्यांच्या क्षमतेच्या आख्यायिका दूरवर पसरल्या. त्यानंतर बाबांची लोकप्रियता वाढली.
कित्येक वर्षांपासून सुरू आहे हे काम
एकदा त्यांचं वय विचारलं असता, बाबांनी उत्तर दिलं, की ते रामाच्या काळातही उपस्थित होते. हे आश्रमाचे गुरु परमहंस रामसुंबर बाबा यांचे भक्त, अनुयायी आजही भटक्या कुत्र्यांसाठी खायला बनवतात. १९६७ मध्ये बाबांनी सर्व भक्तांसमोर आश्रमात समाधी घेतली. दरवर्षी जुलै महिन्यात रथ यात्रा काढली जाते. या आश्रमात कुत्र्यांना रॉयल वागणूक मिळते. त्यांना अत्यंत पवित्र ठिकाणी, बाबांच्या समाधीच्या एका छोट्या मंदिरातही प्रवेश दिला जातो, असंही विश्वस्त म्हणाले.
एकाही कुत्र्याने हल्ला केलेला नाही
मागील १०० वर्षात आश्रमात एकाही कुत्र्याने हल्ला केलेला नाही. आपण माणसंच या प्राण्यांवर हल्ला करतो, असं ते म्हणाले. आजही त्यांच्या आश्रमाचे दरवाजे भटक्या कुत्र्यांसाटी नेहमीच खुले असतात. माणसं अन्न मागू शकतात, कुत्रा काय करणार? त्यांना खायला देण्यात आम्हाला धन्यता वाटते, असं या आश्रमातील अनुयायांचं म्हणणं (Kutte Waale Baba Ka Ashram Nagpur) आहे.