बायकोच्या खुनातून सोडवलं, पण उपकार विसरला; मेहुण्याचं कुटुंब संपवणारा म्हणतो मला फाशी द्या

म.टा. प्रतिनिधी, नागपूर : एका रात्रीत पाच जणांची हत्या करून त्यांचे आयुष्य संपविणाऱ्या विवेक गुलाबराव पालटकरने न्यायालयापुढे स्वत:चे आयुष्य संपविण्याची मागणी केली आहे. 'मला त्वरित संपवा, मला फाशी द्या, आता मला जगण्याची इच्छा नाही', असे मत त्याने न्यायालयासमोर व्यक्त केले आहे.

पाच वर्षांपूर्वी संपूर्ण राज्याला हादरवून सोडणाऱ्या पवनकर कुटुंबीय हत्याकांड प्रकरणातील आरोपी विवेक गुलाबराव पालटकरविरुद्ध दोषारोप सिद्ध झाले आहेत. अशा दुर्मिळातील दुर्मिळ प्रकरणात आरोपीला फाशीची शिक्षा होणार का, याकडे सर्वांचे लक्ष लागलेले आहे. या प्रकरणी मंगळवारी झालेल्या सुनावणीदरम्यान जिल्हा न्यायाधीश आर. एस. पावसकर यांच्यापुढे दोन्ही पक्षांनी फाशीवर युक्तिवाद केला. यात सरकारी पक्षाने हे प्रकरण दुर्मिळात दुर्मिळ असून विवेकला फाशीच का दिली जावी, हे पटवून देण्यासाठी युक्तिवाद केला. तसेच बचावपक्षाने, त्याला फाशी दिली जाऊ नये, हे पटवून देण्यासाठी युक्तिवाद केला.

सांगलीला निघताना मुंबईत नवऱ्याला लुटलं, बॉयफ्रेण्डसोबत छू व्हायला ९ महिने थांबली, कारण...
दोन्ही पक्षांच्या युक्तिवादानंतर न्यायालयाने नियमानुसार, आरोपीला फाशी द्यावी की नाही, यावरील मत जाणून घेतले. यावेळी 'मला त्वरित संपवा, मला फाशी द्या, मला आता जगण्याची इच्छा नाही', असे मत त्याने न्यायालयासमोर मांडले. फाशीवरील दोन्ही बाजुंचा युक्तिवाद पूर्ण झाला आहे. आता शनिवार, १५ एप्रिल रोजी याप्रकरणी निर्णय दिला जाईल. सरकारी पक्षातर्फे अतिरिक्त सरकारी वकील अभय जिकार यांनी कामकाज पाहिले. त्यांना ॲड. मोहम्मद अतिक यांनी सहकार्य केले.

थरारक घटना

मृत कमलाकर पवनकर हा आरोपी विवेक पालटकरचा मेहुणा होता. पालटकरची उच्च न्यायालयाने त्याच्या पत्नीच्या हत्येतील प्रकरणातून सुटका केली होती. या सर्व कायदेशीर प्रक्रियेसाठीचा आर्थिक खर्च पवनकर यांनी केला होता. पुढे कमलाकर आणि विवेक यांच्यात पैसा आणि हिस्स्यावरून वाद झाले. १० जून २०१८ रोजी रात्री ९.३० ते १० वाजतादरम्यान विवेक हा कमलाकर यांच्या घरी रात्रीच्या मुक्कामाने आला. सर्वजण झोपलेले असताना विवेकने रात्री तीनच्या सुमारास लोखंडी सब्बलने एकापाठोपाठ एक घरातील पाचही सदस्यांच्या डोक्यावर प्रहार करून त्यांची हत्या केली. मृतांमध्ये कमलाकर मोतीराम पवनकर (वय ४८), त्यांच्या पत्नी अर्चना (वय ४५), आई मीराबाई (वय ७३), मुलगी वेदांती कमलाकर पवनकर (वय १२) व भाचा कृष्णा ऊर्फ गणेश विवेक पालटकर (वय ५) यांचा समावेश होता. यातून विवेकची मुलगी वैष्णवी पालटकर (वय ७) व मिताली कमलाकर पवनकर (वय ९) या दोघी बचावल्या होत्या. पोलिसांनी विवेकला अटक केली. या पोलिस निरीक्षक मुकंद एम. साळुंके यांनी तपासाअंती न्यायालयात आरोपपत्र दाखल केले.