फाशी नको, बचावपक्षाचा युक्तिवाद; पण दोषीच म्हणे, मला जगायचं नाही!अखेर विवेक पालटकरचा फैसला

म.टा. प्रतिनिधी, नागपूर : एका रात्रीत पाच जणांची हत्या करून त्यांचे आयुष्य संपविणाऱ्या विवेक गुलाबराव पालटकरला जिल्हा व सत्र न्यायालयाचे न्यायाधीश आर. एस. पावसकर यांनी मरेपर्यंत फाशीची शिक्षा सुनावली आहे.

पाच वर्षांपूर्वी संपूर्ण राज्याला हादरवून सोडणाऱ्या पवनकर कुटुंबीय हत्याकांडप्रकरणातील आरोपी विवेक गुलाबराव पालटकरविरुद्ध यापूर्वीच दोषारोप सिद्ध झाले होते. अशा दुर्मिळातील दुर्मिळ प्रकरणात आरोपीला फाशीची शिक्षा होणार का, याकडे सर्वांचे लक्ष लागलेले होते.

यापूर्वी झालेल्या सुनावणीदरम्यान जिल्हा न्यायाधीश आर. एस. पावसकर यांच्यापुढे दोन्ही पक्षांनी फाशीवर युक्तिवाद केला होता. यात सरकारी पक्षाने हे प्रकरण दुर्मिळात दुर्मिळ असून विवेकला फाशीच का दिली जावी, हे पटवून देण्यासाठी युक्तिवाद केला. तसेच बचावपक्षाने, त्याला फाशी दिली जाऊ नये, हे पटवून देण्यासाठी युक्तिवाद केला.

दोन्ही पक्षांच्या युक्तिवादानंतर न्यायालयाने नियमानुसार, आरोपीला फाशी द्यावी की नाही, यावरील मत जाणून घेतले. यावेळी ‘मला त्वरित संपवा, मला फाशी द्या, मला आता जगण्याची इच्छा नाही’ असे मत त्याने न्यायालयासमोर मांडले होते. आज शनिवार, १५ एप्रिल रोजी न्यायालयाने या प्रकरणी निर्णय दिला. सरकारी पक्षातर्फे अतिरिक्त सरकारी वकील अभय जिकार यांनी कामकाज पाहिले. त्यांना ॲड. मोहम्मद अतिक यांनी सहकार्य केले.

थरारक घटना

मृत कमलाकर पवनकर हा आरोपी विवेक पालटकरचा मेहुणा होता. पालटकरची उच्च न्यायालयाने त्याच्या पत्नीच्या हत्येतील प्रकरणातून सुटका केली होती. या सर्व कायदेशीर प्रक्रियेसाठीचा आर्थिक खर्च पवनकर यांनी केला होता. पुढे कमलाकर आणि विवेक यांच्यात पैसा आणि हिस्स्यावरून वाद झाले.

नवी मुंबईत पत्नीचा खून, पापक्षालनासाठी सोलापुरातील बाळूमामाच्या मंदिरात, प्रसाद खाताना अटक
१० जून २०१८ रोजी रात्री ९.३० ते १० वाजतादरम्यान विवेक हा कमलाकर यांच्या घरी रात्रीच्या मुक्कामाने आला. सर्व जण झोपलेले असताना विवेकने रात्री तीनच्या सुमारास लोखंडी सब्बलने एकापाठोपाठ एक घरातील पाचही सदस्यांच्या डोक्यावर प्रहार करून त्यांची हत्या केली.


मृतांमध्ये कमलाकर मोतीराम पवनकर (वय ४८), त्यांच्या पत्नी अर्चना (वय ४५), आई मीराबाई (वय ७३), मुलगी वेदांती कमलाकर पवनकर (वय १२) व भाचा कृष्णा ऊर्फ गणेश विवेक पालटकर (वय ५) यांचा समावेश होता. यातून विवेकची मुलगी वैष्णवी (वय ७) व मिताली कमलाकर पवनकर (वय ९) या दोघी बचावल्या होत्या. पोलिसांनी विवेकला अटक केली. या पोलिस निरीक्षक मुकंद एम. साळुंके यांनी तपासाअंती न्यायालयात आरोपपत्र दाखल केले.