म. टा. विशेष प्रतिनिधी, नागपूर
महानगरपालिका लोकांच्या कल्याणासाठी काम करते. नागरिकांच्या समस्या लक्षात घेऊन त्यांना न्याय देण्याचे कार्य मनपातर्फे होत असते. यामध्ये महत्त्वाची भूमिका ही विशेष समित्यांची असते. गलिच्छ वस्ती निर्मूलन व घरबांधणी समिती ही अत्यंत महत्त्वाची समिती आहे. समाजातील समस्या सोडविण्यासाठी शासनातर्फे अनेक योजना कार्यान्वित करण्यात आलेल्या आहेत. या समितीच्या योजना जनतेपर्यंत पोहोचवून जनसेवेची संधी सभापतीच्या रूपात लाभली आहे. या जनसेवेच्या संधीचे सोने करा, असे प्रतिपादन महापौर नंदा जिचकार यांनी केले.
मनपाच्या गलिच्छ वस्ती निर्मूलन व घरबांधणी विशेष समितीच्या सभापती म्हणून शुक्रवार, १२ जुलैला नगरसेविका तारा (लक्ष्मी) यादव यांनी पदभार स्वीकारला. समिती सभापतींच्या कक्षामध्ये आयोजित पदग्रहण समारंभात महापौर बोलत होत्या. याप्रसंगी महाराष्ट्र इमारत व इतर बांधकाम कामगार कल्याणकारी मंडळाचे अध्यक्ष ओमप्रकाश (मुन्ना) यादव, स्थायी समिती सभापती प्रदीप पोहाणे, सत्तापक्ष प्रतोद दिव्या धुरडे, महिला व बालकल्याण समिती सभापती संगीता गिऱ्हे, शिक्षण समिती सभापती दिलीप दिवे, उपसभापती प्रमोद तभाने, गलिच्छ वस्ती निर्मूलन व घरबांधणी विशेष समितीच्या उपसभापती उषा पॅलट, विधी व सामान्य प्रशासन विशेष समितीच्या उपसभापती मिनाक्षी तेलगोटे, समितीचे सदस्य प्रमोद कौरती, सदस्या रूतिका मसराम, नगरसेविका सोनाली कडू, अर्चना पाठक, वनिता दांडेकर आदी उपस्थित होते. संचालन समितीच्या सदस्या नगरसेविका रूतिका मसराम यांनी केले.
योजना नागरिकांपर्यंत पोहोचवू : यादव
समाजातील जनतेच्या सेवेसाठी पक्षाने महत्त्वाची जबाबदारी सोपविली आहे. पक्षाने दाखविलेल्या विश्वासाला न्याय देण्यासाठी यापूर्वी पदाधिकाऱ्यांनी केलेल्या कामाचे महत्त्वाचे मार्गदर्शन लाभणार आहे. पट्टेवाटप, प्रधानमंत्री आवास योजना, रमाई आवास योजना व इतर योजना लोकापर्यंत पोहोचवून त्याचा त्यांना लाभ मिळवून देण्यासाठी प्रयत्न करणार आहे, असा विश्वास गलिच्छ वस्ती निर्मूलन व घरबांधणी विशेष समितीच्या नवनिर्वाचित सभापती तारा (लक्ष्मी) यादव यांनी व्यक्त केला.
.......