म.टा. प्रतिनिधी, नागपूर
प्राथमिक शाळेतील विद्यार्थ्यांना बाल लैंगिक शोषण समस्येबाबत सजग करणे व टाळण्यासाठी 'विद्यार्थ्यांना सुरक्षेसाठी संवेदनशील करावे' अशी सूचना राष्ट्रीय शैक्षणिक संशोधन व प्रशिक्षण परिषदेने (एनसीईआरटी) शिक्षकांना केली आहे. 'चांगले व वाईट स्पर्श'बाबत विद्यार्थ्यांना अधिक जागरुक करण्यासाठी संस्थेच्या संकेतस्थळावरील 'कोमल' फिल्मचा वापर करण्याचेदेखील सुचवले आहे.
संस्थेच्या प्राथमिक शिक्षण विभागाचे प्रमुख ए.के. राजपूत यांनी माहिती अधिकारांतर्गत सेवाग्राम येथील महात्मा गांधी आयुर्विज्ञान संस्थेच्या न्यायवैद्यक शास्त्राचे प्रा. डॉ. इंद्रजित खांडेकर यांना ही माहिती कळवली.
बाल लैंगिक शोषणाबाबत जागरुकता यावी, विद्यार्थ्यांना अत्याचाराची ओळख व्हावी, याची माहिती शालेय पुस्तकात असावी, असे सुचवणारे २५ पानी अहवाल डॉ. खांडेकर, अनघा इंगळे, सावित्री, गिरीशा, मोहमद कादिर, अन्विता, प्रीती, डॉली, अनुरथी, सुमेध, निखिल आणि श्रीनिधी दातार यांनी तयार करून पंतप्रधान नरेंद्र मोदी, मानव संसाधन विकास मंत्री प्रकाश जावडेकर व एनसीईआरटीला पाठवला होता, हे विशेष.
बाल लैंगिक अत्याचाराशी संबंधित समस्येबाबत एनसीईआरटीच्या पाठ्यपुस्तकात तसेच, प्राथमिक पातळीवर पुरवणी संशोधन सामुग्रीत योग्य माहिती देण्यात आली आहे. विद्यार्थ्यांची सुरक्षा सर्वात महत्त्वाचे आहे. त्यांच्या शारिरीक व भावनिक सुरक्षेच्या विविध घटकांना शिक्षकांनी योग्यरित्या संबोधित करावे. एन्वॉयरमेंट सायन्समध्ये शिक्षक व विद्यार्थ्यांसाठी असलेलेी सामुग्री शाळांद्वारे स्वीकारली जाऊ शकते. यातून मुलांना त्यांच्या सुरक्षेविषयी संवेदनशीलतेची जाणीव होईल, असे राजपूत यांनी डॉ. खांडेकर यांना पाठवलेल्या पत्रात म्हटले आहे.
देशातील बाल लैंगिक अत्याचाराच्या तसेच, शाळांमध्ये होणाऱ्या घटनांचे वाढते प्रमाण लक्षात घेता एनसीईआरटीने उचललेले पाऊल ही समस्या कमी करण्यास मैलाचा दगड ठरेल, असा विश्वास डॉ. इंद्रजित खांडेकर यांनी व्यक्त केला.