मराठा आंदोलकांचा चक्काजाम

म.टा. विशेष प्रतिनिधी, नागपूर

मराठा समाजाला आरक्षण मिळावे, या मागणीसाठी पश्चिम महाराष्ट्रात सुरू असलेल्या आंदोलनाचे पडसाद मंगळवारी नागपुरातही उमटले. दुपारी गणेशपेठ मुख्य बसस्थानकापुढे घोषणा देत चक्का जाम आंदोलन करण्यात आले.

मराठा समाजाला आरक्षण मिळावे, या मागणीसाठी मंगळवारी दुपारी १२ वाजताच्या सुमारास गणेशपेठ येथील मध्यवर्ती बसस्थानकासमोर आंदोलक दाखल झाले. फलक हातात घेतलेल्या आंदोलकांनी प्रवेशद्वारासमोर घोषणाबाजी सुरू करीत बसेस रोखून धरल्या. मिलिंद उर्फ बबलू साबळे यांच्या नेतृत्वात आंदोलकांनी घोषणा देत परिसर दणाणून सोडला. यावेळी पोलिसांनी आंदोलक मिलिंद साबळे यांच्यासह प्रशांत निकम, अमोल माने, बंटी साळुंखे, प्रकाश खंडागळे यांना ताब्यात घेतले. या आंदोलनामुळे नागपूरहून औरंगाबाद व पुण्याकरिता गेलेल्या बसेस खामगाव, अकोल्यापर्यंतच पोहोचू शकल्या. त्यामुळे प्रवाशांची अडचण झाली.

नागपूर गणेशपेठ बसस्थानकाहून गेलेल्या एमएच ४० वाय ५४३२ क्रमांकाच्या बसवर सोमवारी अंबेजोगाईत दगडफेक करण्यात आली. तसेच औरंगाबाद व पुणे येथे गेलेल्या बस त्याच ठिकाणी अडविण्यात आल्या. आंदोलनामुळे प्रवाशांची सुरक्षा लक्षात घेता ही बस तेथूनच नागपूरला परतली. तसेच नागपूरहून पुणे, औरंगाबाद, सोलापूर, जालना, नांदेडला जाणाऱ्या बसेस अकोला, खामगावपर्यंतच चालविण्यात आल्या.