लग्नमंडपात भांडण; ‘गरम’चा हल्ला

नागपूर : लग्नसमारंभात संगीत कार्यक्रमादरम्यान झालेल्या भांडणाची परिणती प्राणघातक हल्ल्यात झाली. सय्यद सोहेल ऊर्फ गरम (१८,रा. हमीदनगर) असे या प्रकरणातील आरोपीचे नाव असून त्याच्यावर अकबर अली हमीद अली (१६) याच्यावर प्राणघातक हल्ला केल्याचा आरोप लावण्यात आला आहे.

ही घटना शनिवारी रात्री १० च्या सुमारास यशोधरानगर पोलिस ठाण्याच्या हद्दीतील संजीवनी क्वॉर्टर येथे घडली. अकबर अली त्याच्या एका मित्राच्या लग्नाकरिता येथे आला होता. गरम आणि त्याचे अन्य साथीदारसुद्धा या कार्यक्रमाकरिता आले होते. संगीताचा कार्यक्रम सुरू असताना अकबरने गरमला टोकले. 'तुम चेंगड क्यो कर रहे हो',असे म्हणून अकबरने गरमला हटकले. यावर 'तू बाहर आ मैं तुझे देख लुंगा,'असे म्हणून गरम तेथून निघून गेला. परंतु, अकबर घरी परत जात असताना गरमने त्याला गाठले आणि 'तू बहोत बज रहा था', असे म्हणून गरम आणि त्याच्या दोन साथीदारांनी अकबरवर तीक्ष्ण शस्त्रांनी प्राणघातक हल्ला चढविला. याप्रकरणी यशोधरानगर पोलिसांनी गुन्हा दाखल केला आहे. पोलिस उपनिरीक्षक रनदई हे या प्रकरणाचा तपास करीत आहेत.