म.टा. प्रतिनिधी, नागपूर
रुग्णांच्या नातेवाईकांकडून होणाऱ्या धिंगाण्याचे शुक्लकाष्ट इंदिरा गांधी शासकीय वैद्यकीय महाविद्यालय व रुग्णालयाची पाठ सोडायला तयार नाही. गेल्या आठवड्यात रुग्णांच्या संतप्त नातेवाईकांनी येथील सुरक्षा रक्षकांना केलेल्या धक्काबुक्कीनंतर केलेल्या दगडफेकीची घटना शांत होत नाही, तोच बुधवारी आणखी एक तणावाची परिस्थिती निर्माण झाली. सुदैवाने गणेशपेठ आणि तहसील पोलिसांनी वेळीच हस्तक्षेप केल्याने पुढील अनर्थ टळला.
मेयोतील अपघात विभागात सकाळी आठपासून सुरू असलेला हा धिंगाणा दुपारी चारपर्यंत धुमसत होता. मेयोच्या मागील बाजूस असलेल्या वस्तीत राहणाऱ्या सलिमा खान (४५) या महिलेला काही जणांनी मेयोतील अपघात विभागात दाखल केले. सलिमा या एका शाळेत शिक्षिका होत्या. शाळेकडे निघाल्या असता छातीत दुखत असल्याने नातेवाईकांनी त्यांना तडकाफडकी मेयोत आणले. सलिमा यांना श्वास घेण्यासही त्रास होत असल्याने तिथे ड्यूटीवरील डॉक्टरांनी लगेच त्यांना मेयोतील मेडिसिन विभागातल्या अतिदक्षता विभागात रेफर केले. मात्र तोवर त्यांची प्रकृती आणखी खालावली आणि काही क्षणातच त्यांचा मृत्यू झाला. सलिमा यांचा मृत्यू हृदयक्रिया बंद झाल्याने झाला असावा, असा डॉक्टरांचा कयास होता. मात्र सलिमा यांचा मृत्यू झाल्याचे डॉक्टरांनी नातेवाईकांना सांगताच जमावाने मृतदेह ताब्यात देण्याची मागणी केली. आम्हाला कोणत्याही परिस्थितीत पोस्टमार्टम करायचे नाही, असे नातेवाईकांचे म्हणणे होते. मात्र हा अकस्मात मृत्यूचा प्रकार असल्याने डॉक्टरांनी पोलिसांना याची माहिती दिली. हा प्रकार सुरू असतानाच एक नातेवाईक रुग्णाच्या उपचाराशी निगडीत कागदपत्रे घेऊन गायब झाला. अन्य नातेवाईक शवविच्छेदन न करताच मृतदेह ताब्यात द्या, यावर अडून बसले. तब्बल तीन वाजेवर्यंत हा गोंधळ सुरू होता. नातेवाईकांचा धिंगाणा पहाता मेयो प्रशासनाने तहसील आणि गणेशपेठ पोलिसांना याची माहिती दिली. पोलिस पथक त्वरीत घटनास्थळी पोचले. त्यानंतर नातेवाईकांची समजूत काढून मृतदेह उत्तरीय तपासणीसाठी पाठविण्यात आला.