झोनमध्ये पोहोचल्यावर उडाला गोंधळ; महापौरांची मध्यस्थी
म.टा.विशेष प्रतिनिधी,नागपूर
करोनाच्या पार्श्वभूमीवर आवश्यक त्या सर्व यंत्रणांची मदत घेतली जात आहे. अशातच मध्यरात्री मनपातील शिक्षकांना व्हॉट्सअपवरून संदेश देत सर्वेक्षणाच्या कामासाठी बोलवून घेण्यात आले. कुठलेही लेखी आदेश नसताना मोठ्या संख्येत शिक्षक लक्ष्मीनगर झोनमध्ये दाखल झाल्यानंतर एकच गोंधळ उडाला. शिक्षक पोहोचले. परंतु, डॉक्टरच गैरहजर होते. त्यानंतर उशिरा आलेल्या डॉक्टरांनी शिक्षकांसोबत अरेरावी केल्याचा मुद्दा उपस्थित झाला. त्यामुळे वादावादी झाली. अखेर, महापौर संदीप जोशी यांना तेथे पोहोचावे लागले. महापौरांच्या मध्यस्थीनंतर शिक्षकांनी सर्वेक्षणास सुरुवात केली.
सकाळी आठ वाजता लक्ष्मीनगर झोनमध्ये पोहोचण्याबाबतचे मेसेज प्राथमिक व माध्यमिक शाळांतील सर्व शिक्षकांना शुक्रवारच्या मध्यरात्री मिळाले. त्यानुसार, साडेपाचशेवर शिक्षक एकाचवेळी झोन कार्यालयात हजर झाले. शहरात जमावबंदीचे १४४ कलम असताना नियोजनशून्य पद्धतीने बोलविण्यात आल्याची शिक्षकांची ओरड होती. त्यानंतर त्यांच्याशी करण्यात आलेल्या गैरव्यवहारांमुळे डॉक्टर्स, अधिकारी व शिक्षक यांच्यात वाद झाला. 'मौखिक नको, लेखी आदेश हवेत', असा आग्रह शिक्षकांनी धरला. शिवाय, गर्दी टाळण्यासाठी मनपाच्या इतरही झोनमध्ये बोलाविले असते तर बरे झाले असते, अशी सूचना केली. त्यामुळे अधिकारीवर्ग भडकला. गैरवर्तणुकीची भाषा केल्याने शिक्षकांनी तीव्र संताप व्यक्त केला. वाद वाढत गेल्यानंतर अखेर महापौरांकडे तक्रार करण्यात आली. त्यानंतर महापौर स्वत: झोनमध्ये दाखल झाले. गर्दीत कुणी संक्रमित झाला तर जबाबदारी कोण घेणार, असा सवाल महापौरांनी अधिकाऱ्यांना केला. यावेळी शिक्षणाधिकारी प्रीती मिश्रीकोटकर यांनी मध्यरात्री संदेश देण्यात आल्याचे मान्य केले. तर, डॉ. प्रवीण गंटावार यांनी हे काही शिक्षकांवर ओरडले, त्यांनी उद्धट भाषेचा वापर केला, अशी तक्रार महापौरांकडे करण्यात आली.
उच्च रक्तदाब शिक्षकांना सवलत
३१ मार्चला सेवानिवृत्ती असलेल्या शिक्षकांना सर्वेक्षणातून वगळावे, अशी सूचना महापौरांनी आयुक्तांकडे केली. तर, उच्च रक्तदाब असलेल्या शिक्षकांबाबत संबंधित झोनस्तरावरून निर्णय घेण्यात येईल, असे आयुक्तांनी कळविले. मात्र, दोनशेवर रक्तदाब असलेल्यांना यातून वगळण्यात येईल, असे संकेत देण्यात आले आहेत.
शिक्षिकाच कोसळली
सर्वेक्षणासाठी रात्री उशिरा संदेश मिळाल्यानंतर कारवाईच्या भीतीने मोठ्या संख्येत शिक्षिका झोनमध्ये पोहोचल्या. घरून नाश्ता वा जेवणाचा डबाही सोबत नव्हता. आल्यानंतर या शिक्षकांना प्रश्नावली देण्यात आली. त्यानंतर काही शिक्षक सर्वेक्षणासाठी नेमून दिलेल्या भागांत पोहोचले. यात तपोवन भागात सर्वेक्षण करीत असलेल्या संजयनगर हिंदी प्राथमिक शाळा नं.१ येथील सहायक शिक्षिका प्रभावती प्रेमराज पाटणे या जमिनीवर कोसळल्या. त्यांच्यावर उपचार करण्यात आले.