म. टा. प्रतिनिधी, नागपूर
काचीपुरा येथील हिरणवार टोळीविरुद्ध गुरुवारी महाराष्ट्र संघटित गुन्हेगारी प्रतिबंधक कायद्यांतर्गत (मोक्का) कारवाई करण्यात आली. शैलेश ऊर्फ बंटी विनोद हिरणवार (२४), साहिल ऊर्फ सोनू दिलीप शेंद्रे (२२), करण प्रशांत शेंडे (२४), शक्ती राजेश यादव (२०), पवन धीरज हिरणवार (२१), सूरज धीरज हिरणवार (२४) व सौरभ ऊर्फ मोन्या प्रवीण काळसर्पे (२४,सर्व रा. काचीपुरा),अशी मोक्काअंतर्गत कारवाई करण्यात आलेल्या गुन्हेगारांची नावे आहेत.
बजाजनगर चौकात डोनाल्ड बाबाराव ढोमणे यांचे बैठक रेस्टॉरेंट असून, अभिषेक राजेश पटेल (२४ रा.काचीपुरा) हा तेथे व्यवस्थापक आहे. शैलेश हा अभिषेकला ओळखतो. शैलेश हा काचीपुऱ्यात अन्य एका गुंडाच्या टोळीसोबत बोलताना हिरणवार टोळीला दिसला होते. त्यामुळे हिरणवार टोळीने अभिषेकसोबत वाद घातला होता. २४ मे रोजी ८ वाजताच्या सुमारास हिरणवार टोळीने दारू प्यायली. अभिषेकचा काटा काढण्यासाठी ते बैठक रेस्टॉरेंट येथे गेले. तेथे शिवीगाळ करायला सुरुवात केली. डोनाल्ड यांनी त्यांना हटकले. हिरणवार टोळीने डोनाल्ड यांना मारहाण केली. वेटर धावल्याने हिरणवार व त्याचे साथीदार तेथून पसार झालेत. बजाजनगर पोलिसांनी प्राणघातक हल्ल्याचा गुन्हा दाखल करून हिरणवार टोळीला अटक केली. गुन्हेगारी अभिलेख तपासला असता या टोळीविरुद्ध १९ गुन्हे दाखल असल्याचे समोर आले. पोलिस उपायुक्त कृष्णकांत उपाध्याय यांनी या टोळीविरुद्ध मोक्काची कारवाई करण्याचा प्रस्ताव अतिरिक्त पोलिस आयुक्त श्यामराव दिघावकर यांच्याकडे पाठविला. अतिरिक्त पोलिस आयुक्तांनी गुरुवारी मोक्काच्या कारवाईला मंजुरी दिली. हिरणवार टोळी सध्या कारागृहात आहे.
.......