म.टा. विशेष प्रतिनिधी, नागपूर
मनोरंजन पार्क (अॅम्युझमेंट) उद्योगात रोजगार उपलब्ध करून देण्याची भरपूर क्षमता आहे. या क्षेत्राला विकसित करण्यासाठी एमएसएमई सहकार्य करण्यास तयार आहे. त्यासंदर्भात कृती आराखडा तयार करता येईल. तो करण्यासाठी सर्वतोपरी सहकार्य करू अशी ग्वाही केंद्रीय परिवहन आणि लघु-सूक्ष्म-मध्यम उद्योग मंत्री नितीन गडकरी यांनी दिली.
गडकरींनी व्हिडीओ कॉन्फरसिंगच्या माध्यमातून इंडियन असोसिएशन ऑफ अॅम्युझमेंट पार्कच्या पदाधिकाऱ्यांशी 'ई-संवाद' साधला. मनोरंजन क्षेत्रातील उद्योगात नवीन संशोधन करण्यास भरपूर वाव आहे. राष्ट्रीय महामार्गाला लागून असलेल्या रिकाम्या जागांवर असे पार्क विकसित केले जाऊ शकतात. त्यासाठी राष्ट्रीय महामार्ग प्राधिकरण सहकार्य करण्यास तयार असल्याचे त्यांनी सांगितले. महामार्गांशेजारी मनोरंजन पार्क विकसित झाले, तर लोकांना चांगली संधी उपलब्ध होईल. महामार्गावर मोठ्या प्रमाणावर वाहतूक असते. त्याचा फायदाही या पार्कला मिळू शकतो. हा उद्योग अधिक रोजगार निर्माण करू शकतो. जागा विकसित करताना मात्र पार्कशेजारी रेस्टॉरंट, लहान दुकाने, पार्किंग, वॉशरुम, परदेशात असतात त्याप्रमाणे अधिक सुविधा उपलब्ध करून देणे गरजेचे आहे. त्यातूनही उत्पन्नाची साधने निर्माण होऊ शकतात. खासगी गुंतवणुकीतूनही असे प्रकल्प साकार केले जाऊ शकतात. एमएसएमईतर्फेही या प्रकल्पासाठी सहकार्य करू, असेही गडकरी म्हणाले.