संपत्तीसाठी आईवर खुनीहल्ला
चापरे मोहल्ल्यातील थरारक घटना, मुलाला अटक
नागपूर : संपत्तीसाठी पोटच्या मुलाने आईवरच धारधार शस्त्राने वार करून तिच्या हत्येचा प्रयत्न केला. ही खळबळजनक घटना तहसीलमधील चापरे मोहल्ला येथे शुक्रवारी सायंकाळी घडली. पोलिसांनी हत्येचा प्रयत्न केल्याचा गुन्हा दाखल करून मुलाला अटक केली आहे. लीलावती केशव रंभाड (४६) असे जखमी आईचे तर दीप केशव रंभाड ( वय २५ रा. व्यंकटेशनगर),असे अटकेतील मुलाचे नाव आहे. लीलावती यांच्यावर मेयो हॉस्पिटलमध्ये उपचार सुरू असून,त्यांची प्रकृती चिंताजनक असल्याची माहिती आहे.
पोलिसांनी दिलेल्या माहितीनुसार, लिलावती व त्यांचा भाऊ प्रॉपर्टी डिलिंग करतात. लीलावती यांचे पती गडचिरोली येथे शासकीय नोकरीवर आहेत. दीप हा खासगी काम करतो. गत पाच वर्षांपासून दीप हा वडिलांसोबत वेगळा व्यंकटेशनगर येथे राहतो. चापरे मोहल्ला येथील घर नावावर करून देण्यासाठी दीप हा लीलावती यांच्यासोबत वाद घालत होता. त्यांनी दीप याच्या नावे घर करून देण्यास नकार दिला. काही दिवसांपूर्वीच लीलावती यांनी घर विक्रीला काढले. याबाबत कळताच दीप संतापला. शुक्रवारी सायंकाळी ५ वाजताच्या सुमारास तो लीलावती यांच्या घरी गेला. 'घर विक्रीला कशाला काढले. ते माझ्या नावाने करून दे,'असे म्हणत त्याने लीलावती यांच्याशी वाद घालायला सुरुवात केली. त्यानंतर काही वेळातच दीपने धारदार शस्त्राने लीलावती यांच्या छातीवर ,डोक्यावर व पायावर सपासप वार करायला सुरूवात केली. रक्ताच्या थारोळ्यात लीलावती खाली कोसळल्या. मदतीसाठी आरडाओरड केली. दीप पसार झाला. शेजारी राहणारी महिला मदतीसाठी धावली. अन्य नागरिकांच्या मदतीने लीलावती यांना मेयो हॉस्पिटलमध्ये दाखल केले. घटनेची माहिती मिळताच तहसील पोलिस स्टेशनचे वरिष्ठ पोलिस निरीक्षक वैभव जाधव यांच्या मार्गदर्शनाखाली उपनिरीक्षक ए. एस. बकतवार ताफ्यासह तेथे पोहोचले. पंचनामा केला. मेयो हॉस्पिटलमध्ये लीलावती यांचे बयाण घेतले. मुलानेच ठार मारण्याचा प्रयत्न केल्याचे त्यांनी सांगितले. पोलिसांनी दीप याच्याविरुद्ध प्राणघातक हल्ल्याचा गुन्हा दाखल केला. नंदनवन पोलिसांच्या मदतीने तहसील पोलिसांनी दीप याला अटक केली.त्याची पोलिस कोठडी घेण्यात आली आहे.