म.टा. विशेष प्रतिनिधी, नागपूर
वर्धमाननगरमधील पूनम मॉल पडल्याप्रकरणी पोलिसांनी मॉलचे मालक एन. कुमार हिरचंदानी यांना जिल्हा व सत्र न्यायालयाने अटकपूर्व जामीन मंजूर केला. त्यामुळे एन. कुमार यांना मोठा दिलासा मिळाला आहे.
वर्धमाननगरमधील पूनम मॉलची भिंत कोसळल्याप्रकरणी दाखल गुन्ह्यात अटक करण्यासाठी लकडगंज पोलिसांनी बिल्डर एन. कुमार यांना अटक करण्याचा प्र्यत्न केला. मात्र, एन. कुमार यांनी याप्रकरणात अटकपूर्व जामीन मिळवण्यासाठी जिल्हा व सत्र न्यायाधीशांकडे अटकपूर्व जामीनासाठी अर्ज दाखल केला.
पूनम मॉलची भिंत व सज्जा कोसळून हिवरीनगर येथील निवासी चौकीदार जयप्रकाश रामनाथ शर्मा यांचा मृत्यू झाला. या घटनेत मुक्ताबाई रामभाऊ गजभिये व नंदकिशोर हे दोघे जखमी झाले. याप्रकरणी लकडगंज पोलिसांनी एन. कुमार व अन्य संबंधित व्यक्तींविरुद्ध निष्काळजीपणे मृत्यूस कारणीभूत ठरल्याचा आरोपाखली भादंवि कलम ३०४,३३७,२४७ आणि ३४ अन्वये गुन्हे दाखल केले
दरम्यान, पोलिसांनी भादंविच्या कलम ३०४ अन्वये दाखल केलेल्या गुन्ह्याला एन. कुमार यांनी अटकपूर्व जामीनामध्ये विरोध केला आहे. मॉलच्या कोसळण्याच्या आणि त्यात झालेल्या दुर्घटनेला जबाबदार नसल्याचा दावा करण्यात आला आहे. तसेच सदर इमारत १५ वर्षे जुनी असून तिथे दुर्देवी घटना घडावी असा कोणताच उद्देश मालकाचा नव्हता. त्यामुळे या प्रकरणी भादंविच्या कलम ३०४ अन्वये गुन्हा दाखल होऊ शकत नाही, असे अर्जात नमूद करण्यात आले. सदर युक्तिवाद ग्राह्य मानून न्यायालयाने सशर्त अटकपूर्व जामीन मंजूर केला. एन. कुमार यांच्यावतीने वरिष्ठ अधिवक्ता सुबोध धर्माधिकारी आणि अॅड. देवेंद्र चौहान यांनी बाजू मांडली.