वनपरिक्षेत्र अधिकारी, शाखा अभियंता एसीबीच्या जाळ्यात

नागपूर ः कंत्राटदाराचे बिल मंजूर करण्यासाठी ३ लाख २० हजार रुपयांची लाच घेणाऱ्या काटोल परिक्षेत्राचे वनपरिक्षेत्र अधिकारी व वनविभागाच्या शाखा अभियंत्याला लाचलुचपत प्रतिबंधक विभागाने बुधवारी रंगेहाथ अटक केली. एसीबीच्या या कारवाईमुळे वनविभागातील अधिकारी व कर्मचाऱ्यांमध्ये खळबळ उडाली असून, या प्रकरणात आणखीही काही अधिकारी एसीबीच्या जाळ्यात अडकण्याची शक्यता वर्तविण्यात येत आहे. वनपरिक्षेत्र अधिकारी अशोक काशीराम माकडे (५४) व शाखा अभियंते अनिल पडोळे अशी अटकेतील अधिकाऱ्यांची नावे आहेत.

काटोलमधील भोरगड भागातील पुलासह (रपटा) चार ठिकाणच्या बांधण्याचे काम एका कंत्राटदाराला देण्यात आले. कामाचे ११ लाख ४६ हजार रुपये झाले. बिल मंजूर करण्यासाठी कंत्राटदार माकडे यांना भेटले. माकडे यांनी त्यांना तीन लाख रुपयांची लाच मागितली. बिल मंजुरीसाठी लागणारी मोजमाप पुस्तिका देण्यासाठी शाखा अभियंते पडोळे यांनी २० हजारांची लाच मागितली.

मात्र, नियमानुसार काम मिळविल्याने कंत्राटदाराने एसीबीकडे तक्रार दिली. अधीक्षक महेश चिमटे यांच्या मार्गदर्शनाखाली एसीबीच्या पथकाने बुधवारी धरमपेठेतील गणेशसागर रेस्टॉरंटमध्ये सापळा रचला. येथे माकडे यांनी तीन लाखांची लाच स्वीकारताच एसीबीने त्यांना अटक केली. तर पडोळे यांनी झिरो माइल येथील कार्यालयात २० हजारांची लाच स्वीकारली.


माकडेंकडे आढळले १२ लाख

अशोक माकडे यांचे वडील काशीराम माकडे हे राज्य राखीव पोलिस दलाचे कमांडन्ट होते. माकडे हे हिंगणा मार्गावरील संत गाडगेनगर भागात राहातात. एसीबीने त्यांच्या घराची झडती घेतली असता १२ लाख ३५ हजारांच्या चलनी नोटा आढळल्या. याशिवाय २५ तोळे सोन्याचे दागिनेही आढळले. शेती खरेदीसाठी पैसे जमविल्याचे माकडे यांनी एसीबीला सांगितले. मात्र एवढी मोठी रक्कम बँकेतून काढलेली नाही अथवा कोणाकडून उधारही घेतलेली नाही. त्यामुळे ही रक्कमही माकडे यांनी लाच स्वरूपात स्वीकारल्याची शक्यता असल्याचे एसीबीच्या सूत्रांनी सांगितले.