​ ‘ईव्हीएमचे सर्किट आणि मेमरी तपासा’

नागपूर : महापालिकेच्या निवडणुकांमध्ये इलेक्ट्रॉनिक व्होटिंग मशिनमध्ये (ईव्हीएम) घोटाळा झाला असून, त्यामुळेच काँग्रेसचा पराभव झाला आहे. ईव्हीएममुळे निवडणुका योग्य पद्धतीने होत नसल्याने पूर्वीप्रमाणेच मतपत्रिकांद्वारे मतदान घेण्यात यावे, ईव्हीएमचे सर्किट आणि मेमरी तपासण्यात यावी, अशी मागणी काँग्रेसचे उमेदवार प्रशांत धवड यांच्या पत्नी प्रणोती यांनी शनिवारी पत्रपरिषदेत केली. याकरिता आपण हायकोर्टात दाद मागणार असल्याचेही त्यांनी यावेळी सांगितले.

यंदाच्या निवडणुकांमध्ये भाजपविरोधी वातावरण होते. नोटाबंदी, बेरोजगारी ही परिस्थिती भाजपकरिता अजिबात अनुकूल नव्हती. तरीसुद्धा भाजपचे १०८ उमेदवार नगरसेवक म्हणून निवडून आले, हे कदापी शक्य नाही. प्रचारादरम्यान काँग्रेसला मिळालेला प्रतिसाद हा अवर्णनीय आहे. परंतु, निकाल काँग्रेसच्या विरोधात लागले. शहराध्यक्ष विकास ठाकरे, प्रशांत धवड या व्यक्तींना जनाधार असताना त्यांना पराभवाचा सामना करावा लागला आहे. मतदार आमच्या दारात येऊन सांगत आहेत की त्यांनी काँग्रेसलाच मतदान केले. त्यामुळे या निवडणुकीमध्ये वापरण्यात आलेल्या ईव्हीएमचे सर्किट आणि मेमरी यांची तपासणी करण्याची परवानगी आम्ही मागितली आहे. तसेच निवडणुकांमध्ये ईव्हीएम प्रक्रिया बंद करून मतदानपत्रिकांद्वारेच मतदान घेण्यात यावे, याकरिता आम्ही हायकोर्टात दाद मागणार आहोत, असे धवड म्हणाल्या.