'हा होमहवन नाही तर जादूटोणाच'; बहुचर्चित हॉस्पिटलच्या डॉक्टरची घरमालकाविरोधात तक्रार

नागपूर : घरमालकावर जादूटोणा केला, असा आरोप एका डॉक्टरने केला आहे. या डॉक्टरने वाडी पोलिस ठाण्यात याबाबत तक्रारही केली आहे.
वाडी पोलिस ठाण्याच्या हद्दीतील एका बहुचर्चित हॉस्पिटलच्या डॉक्टरने पोलिसांत याबाबत तक्रार दाखल केली.

अशी आहे घटना

डॉक्टरने एका बिल्डरकडून जागा भाड्याने घेतली व तेथे हॉस्पिटल सुरू केले. गेल्या काही काळात विविध घटनांमुळे हे हॉस्पिटल चर्चेत राहिले आहे. या डॉक्टरने पोलिसांकडे केलेल्या तक्रारीनुसार, या इमारतीच्या मालकाकडून त्याने हॉस्पिटलसाठी जागा भाड्याने घेतली. गेल्या काही काळापासून या दोघांमध्ये वाद सुरू असल्याचे कळते. जमीनमालकाने या जागेत जादूटोणा केल्याचा आरोप या डॉक्टरने केला आहे. यावर पोलिसांनी या जमीनमालकाशी संपर्क साधला. मात्र, आपण फक्त होमहवन केल्याचे या घरमालकाने स्पष्ट केले आहे. या प्रकरणाची नीट चौकशी केल्यानंतर यात गुन्हा दाखल करायचा की नाही, हा निर्णय घेतला जाईल, असे वाडी पोलिसांनी सांगितले. त्यामुळे अद्याप याप्रकरणी गुन्हा दाखल करण्यात आलेला नाही. संबंधित तपास सुरू आहे.