दहा हजारांसाठी शेतकऱ्याची आत्महत्या

वाशीम : कर्जमाफीदरम्यान हंगामाच्या सोयीसाठी सरकारने दहा हजारांची तातडीची मदत देण्याचे जाहीर केले. मात्र पेरणी उलटल्यानंतर ही मदत मिळालेली नाही. या विंचनेतूनच रिसोड तालुक्यातील पळसखेड येथील एका अल्पभूधारक शेतकऱ्याने आत्महत्या केल्याची घटना रविवारी घडली. श्रीराम मोतीराम गिऱ्हे (५०) असे त्या शेतकऱ्याचे नाव आहे. श्रीराम यांच्या पत्नीच्या नावे अडीच एकर शेतजमीन आहे.

या शेतीच्या भरवशावर आपल्या कुटुंबीयांची उपजिविका करीत होते. मात्र नापिकीने त्यांना कर्ज फेडणे अशक्य झाले होते. त्यातच कर्जमाफी जाहीर होऊन सरकारने दहा हजारांची तातडीची मदत देणार असल्याने हंगामाची सोय झाल्याच्या आनंदात होते. त्यासाठी त्यांनी वारंवार बँकेचे उंबरठे झिजविले.

मात्र निकष आणि नियमात बदल होत असल्याने बँक अधिकाऱ्यांकडून त्यांना मदत मिळू शकली नाही. यातच त्यांनी सकाळी शेतावर जाऊन गळफास घेतला. बराच वेळ होऊनही ते न परतल्याने कुटुंबीयांनी शेतावर जावून पाहिले असता घटना समोर आली.