म.टा. विशेष प्रतिनिधी, नागपूर
नागपूर स्मार्ट अॅण्ड सस्टेनेबल सिटी डेव्हलपमेंट कारपोरेशन लिमिटेडच्या 'नागपूर सेफ अॅण्ड स्मार्ट सिटी' उपक्रमाचा राष्ट्रीय पातळीवर नवी दिल्लीत गौरव करण्यात आला. उपक्रमातून शहरात ६७१ चौकांत ३,६०० सीसीटीव्ही कॅमेरा लावण्यात आले आहेत. त्यातून पोलिसांना गुन्हेगारीवर नियंत्रण ठेवण्यास मदत होत आहे.
यानिमित्ताने नवी दिल्लीत झालेल्या स्मार्ट सिटी एम्पावरिंग इंडिया कार्यक्रमात केंद्रीय गृहनिर्माण राज्यमंत्री हरदिपसिंह पुरी यांच्या हस्ते नागपूर स्मार्ट सिटीच्या प्रमुख नालेज ऑफिसर शुभांगी गाढवे यांना सन्मानचिन्ह प्रदान करण्यात आले. महापौर संदीप जोशी, णि मनपा आयुक्त तुकाराम मुंढे यांनी स्मार्ट सिटीच्या टीमचे यानिमित्त कौतुक केले आहे. तत्कालीन मुख्यमंत्री देवेंद्र फडणवीस यांच्या कार्यकाळात हा प्रकल्प नागपुरात सुरू झाला. नागपूरच्यावतीने या पुरस्कारासाठी नोव्हेंबर २०१९मध्ये प्रस्ताव पाठविण्यात आला होता. तत्कालीन मुख्य कार्यकारी अधिकारी डॉ. रामनाथ सोनवणे यांनी निर्णायकांसमोर डिसेंबर २०१९ मध्ये प्रकल्पाचे सादरीकरण केले. त्यानंतर नागपूरची निवड करण्यात आली.