सात लाखांचा 'हनीट्रॅप'; शिक्षकाकडून सात लाख उकळले, महिलेसह ६ जणांविरुद्ध गुन्हा दाखल

म.टा. प्रतिनिधी, नागपूर : हनीट्रॅपमध्ये अडकवून शिक्षकाकडून साथीदारांच्या मदतीने महिलेने तब्बल सात लाख रुपये उकळले. याप्रकरणी जुनी कामठी पोलिसांनी महिलेसह सहा जणांविरुद्ध कट रचून खंडणी उकळण्यासह विविध कलमान्वये गुन्हा दाखल केला आहे.

काय आहे प्रकरण?

परवीन, परवेज, यासीन, अक्रम, साजिद मौसीन, अशी गुन्हा दाखल करण्यात आलेल्यांची नावे आहेत. ४०वर्षीय शिक्षकाच्या तक्रारीवरून हा गुन्हा दाखल करण्यात आला. परवीन ही खासगी काम करते. ती शिक्षकाला ओळखते. जानेवारी २०२०मध्ये शिक्षक बँकेत गेला. यावेळी कर्ज काढण्यासाठी परवीनही बँकेत आली. मात्र, तिला कर्ज मिळाले नाही. काही दिवसांनी ती पुन्हा बँकेत आली. यावेळीही शिक्षक तिला बँकेत भेटला. त्याने परवीनकडे विचारणा केली. कर्ज मिळाले नसल्याने पुन्हा ते घेण्यासाठी आल्याचे तिने सांगितले. याचदरम्यान परवीनने शिक्षकासोबत जवळीक साधण्याचा प्रयत्न केला.

मद्यधुंद बहिणींचा पबमध्ये राडा; बीअरची बॉटलच फेकून मारली, महिला बाउन्सरसह दोघे जखमी
तिने शिक्षकाच्या मोबाइलवर वारंवार संपर्कही साधला. त्यानंतर परवीनने शिक्षकाच्या पत्नीसोबत मैत्री केली. वैद्यकीय तपासणीसाठी पैशाची गरज असल्याचे परवीनने शिक्षकाच्या पत्नीला सांगितले. शिक्षकाच्या पत्नीने शिक्षकाकडून २५ हजार रुपये घेऊन परवीनला दिले. ऑक्टोबरमध्ये परवीनने पैसे घेण्यासाठी शिक्षकाला टेकानाका परिसरात राहणाऱ्या नातेवाइकाकडे बोलाविले. शिक्षक तेथे गेला. परवीनने त्याच्यासोबत आक्षेपार्ह छायाचित्र काढून मोबाइलद्वारे चित्रीकरण केले. ही चित्रफीत व्हायरल करण्याची धमकी देत वेळोवेळी शिक्षकाकडून सात लाख रुपये उकळले. तसेच त्याच्यासोबत लग्न केल्याचे बनावट दस्तऐवजही तयार केले. त्याआधारे पोटगीसाठी न्यायालयात अर्जही दाखल केला. या छळाला कंटाळून शिक्षकाने जुनी कामठी पोलिसांत तक्रार दिली. पोलिसांनी गुन्हा दाखल करून तपास सुरू केला आहे.