म. टा. प्रतिनिधी, नागपूर
नागपूर विभाग शिक्षक मतदारसंघाची आणि नागपूर महापालिकाची निवडणूक जाहीर झाली असल्याने आदर्श आचारसंहिता लागू करण्यात आली आहे. ५ जानेवारीपासूनच प्रशासनाने या आचारसंहितेचे पालन व्हावे यासाठी शहरातील विविध भागात लागलेले १ हजार ११५ होर्डिंग काढले आहे. शहराच्या विविध भागात लागलेले राजकीय पक्षांचे १९५ झेंडेही काढण्यात आले असल्याचे मनपा प्रशासनाकडून कळविण्यात आले.
सर्व राजकीय पक्षांना एका समान पातळीवर निवडणूक लढविता यावी, आणि निवडणूक योग्य आणि निकोप व्हावी, या उद्देशाने निवडणुकीचा कार्यक्रम जाहीर होताच ‘आदर्श आचारसंहिता’ लागू होते. महापालिका निवडणूक जाहीर झाल्याने नागपुरात आदर्श आचारसंहिता लागू झाली आहे. आचारसंहितेसोबतच अनेक निर्बंधही लादण्यात आले. राजकीय पक्षांवर आचारसंहितेचे पालन करणे बंधनकारक आहे, अन्यथा त्यांच्यावर कायदेशीर कारवाई करण्यात येते. आचारसंहितेचे पालन व्हावे याचाच भाग म्हणून प्रशासनाकडून शहरातील १ हजार ११५ होर्डिंग आणि १९५ झेंडे काढण्यात आले आहे. शिक्षक मतदारसंघाची निवडणूक जाहीर झाल्यापासून म्हणजे ५ जानेवारीपासूनच प्रशासनाने कारवाईला सुरुवात केली.
-अशी झाली कारवाई...
-५ जानेवारी : ५२३ होर्डिंग
-६ जानेवारी : १९३ होर्डिंग
-७ जानेवारी : १२३ होर्डिंग
-९ जानेवारी : १९५ होर्डिंग
-१० जानेवारी : ८१ होर्डिंग