राष्ट्रवादी ओबीसीच्या प्रदेशाध्यक्षपदी ईश्वर बाळबुधे

नागपूर : राष्ट्रवादी काँग्रेस ओबीसी सेलच्या प्रदेशाध्यक्षपदी नागपुरातील पक्षाचे प्रवक्ते ईश्वर बाळबुधे यांची, तर युवती काँग्रेसच्या प्रदेशाध्यक्षपदी दिवंगत आर.आर. पाटील यांची कन्या स्मिता पाटील हिची नियुक्ती करण्यात आली.

भाजप ओबीसी मोर्चाच्या प्रदेशाध्यक्षपदी नंदूरबार येथील विजय चौधरी यांना शह देण्यासाठी राष्ट्रवादीनेदेखील सामाजिक, जातीय समीकरणाचा आधार घेत महाराष्ट्र प्रांतिक तेली समाज महासभेचे प्रदेश सचिव व प्रवक्ते ईश्वर बाळबुधे यांना संधी दिली. या नियुक्तीसोबत पक्षाने ओबीसी विशेषतः तेली समाजाला आणखी जवळ करण्याचा प्रयत्न केला आहे. या नियुक्तीसाठी समाजाचे नेते जयदत्त क्षीरसागर, खासदार प्रफुल्ल पटेल आणि माजी मंत्री अनिल देशमुख यांनी पुढाकार घेतला. त्यास पक्षाचे सर्वेसर्वा शरद पवार, अजित पवार व प्रदेशाध्यक्ष सुनील तटकरे यांनी सहमती दर्शवल्याने नागपूरला आणखी एक मोठे पद मिळाले आहे.

पक्षाच्या स्थापनेपासून ईश्वर बाळबुधे यांनी सक्रिय काम केले. परंतु, त्यांना अपेक्षित पद मिळाले नाही. अनिल देशमुख यांच्या कार्यकारिणीत त्यांच्याकडे प्रवक्तेपदाची जबाबदारी आहे. प्रदेशाध्यक्ष सुनील तटकरे यांनी बुधवारी मुंबईत या नियुक्त्यांची घोषणा केली. यावेळी ईश्वर बाळबुधे यांच्यासह अनिल देशमुख, प्रदेश प्रवक्ते अतुल लोंढे, अजय पाटील, प्रकाश वानखेडे, दिनकर वानखेडे आदी उपस्थित होते.

पक्ष बळकट करण्यासाठी घरावर तुळशीपत्र ठेवून येणाऱ्या काळात काम करण्याचे प्रयत्न राहतील. यात ओबीसी समाजातील सर्व घटक पक्षाशी जोडण्यासाठी आवश्यक ते प्रयत्न करण्यात येईल, असे ईश्वर बाळबुधे म्हणाले.