वाहनाच्या धडकेत बिबट्या ठार

म.टा. प्रतिनिधी, अमरावती

रस्ता ओलांडत असताना भरधाव वाहनाने धडक दिल्याने बिबट्या ठार झाला. ही घटना शनिवारी पहाटेच्या सुमारास चांदुर रेल्वे मार्गावर घडली.

शनिवारी सकाळी काही नागरिक मॉर्निंग वॉक करीत असताना त्यांना रस्त्याच्या मधोमध एक बिबट मृतावस्थेत पडला असल्याचे दिसून आले. वाहनाच्या धडकेत बिबट ठार झाला असल्याचे लक्षात येताच त्यांनी वनविभागास त्याची माह‌िती दिली. वनपरिक्षेत्र अधिकारी पडगव्हाणकर यांनी पथकासह घटनास्थळी दाखल झाले. उपवनसंरक्षक हेमंत मीना हेदेखील घटनास्थळी पोहोचले.

चांदुररेल्वे मार्गावर ठार झालेल्या बिबटास भरधाव वेगातील वाहनाने घासत नेल्याचेही घटनास्थळावरून दिसून आले. मृत बिबट हा सहा ते सात महिने वयाचा असण्याचा अंदाज वनविभागाच्या अधिकाऱ्यांनी वर्तविला. ठार झालेला बिबट हा त्यांच्या साथीदारापासून वेगळा झाला होता. त्यांच्या शोधात तो रस्ता ओलांडत असतांनाच त्याला वाहनाची धडक बसल्याने तो मृत झाला. वनविभागाने पशुवैद्यकीय दवाखान्यात बिबट्याचे शवविच्छेदन केल्यानंतर वडाळी येथे त्याच्यावर अंत्यसंस्कार करण्यात आले.