महाराष्ट्रातील झाडे तुटणार नाही

नागपूर : ऑरेंज सिटीसह हिरवे शहर (ग्रीन सिटी) म्हणून ओळख असलेल्या नागपुरातील शेकडो झाडे मेट्रो रेल्वे प्रकल्पामुळे तोडण्यात आली. या शेकडो झाडांच्या बदल्यात ५ हजार झाडे लावून पर्यावरण संवर्धनासाठी महामेट्रोने पाऊल उचलले आहे. मात्र, यापुढे झाडे तुटूच नये यासाठी त्यांचे दुसऱ्या ठिकाणी स्थलांतरित करणारी मशीन विकत घेण्याचा निर्णय महामेट्रोने घेतला आहे. मशीन विकत घेण्यासाठी गुजरातसोबत चर्चाही सुरू असून नागपूरसह पुणे प्रकल्पासाठीही या मशीनचा वापर करण्यात येणार आहे.

ऑटोमोटिव्ह चौक ते मिहान आणि प्रजापतीनगर ते लोकमान्यनगर ही ३८ किलोमीटरची मेट्रो रेल्वे पर्यावरणपुरक असल्याचा दावा महामेट्रोकडून करण्यात येत आहे. प्रकल्पात सौरऊर्जेचा अधिकाधिक वापर, पिअरवर (पिलर) तयार केलेले व्हर्टिकल गार्डन या दिशेने टाकलेले महत्त्वाचे पाऊल आहे. सर्व स्तरातून या उपक्रमाचे कौतुकही होत आहे. मात्र, शहरातील तोडलेले शेकडो झाडे वाचविता आली असती, असाही विचार आता पर्यावरणप्रेमींकडून व्यक्त करण्यात येत आहे. झाडे न तोडता ती सुखरूप मशीनच्या सहाय्याने दुसऱ्या ठिकाणी लावण्याचे जगाने स्वीकारलेले तंत्रज्ञान नागपुरात वापरण्याची गरज असल्याचे वृत्त म.टा.ने प्रसिद्ध केले होते.


प्रयत्न फसला
ट्री ट्रान्सप्लॅनटेशनची मशीन महागडी असल्याने जेसीबी-पोकलॅंडमध्ये थोडे बदल करून नागपुरात ही मशीन तयार करण्याचे प्रयत्न झाले. मात्र यश मिळाले नाही. जेसीबीच्या साहाय्याने झिरो माइल परिसरातील चार झाडे तोडून मिहान परिसरात लावली . महामेट्रो आणि महिंद्रा लाईफ प्रा. लि.च्या संयुक्त विद्यमाने आता झाडांचे स्थलांतरण करण्यात आले. झाडांचे स्थलांतरण करण्यासाठी मशीन खरेदी करण्यात येत असल्याचे महामेट्रोचे व्यवस्थापकीय संचालक ब्रिजेश दीक्षित यांनी सांगितले.