सामाजिक समस्यांचा ‘मूक’ आक्रोश

म. टा. प्रति‌निधी, नागपूर

स्त्रीभ्रूणहत्या, स्त्रीमुक्ती, पाणी वाचवा, दीव्यांग अशा अनेक सामाजिक प्रश्नांवर ‘मूक’ आक्रोश करणारे मूकनाट्य बुधवारी मूकनाट्याविष्कार कार्यक्रमात सादर करण्यात आले.

सांस्कृतिक कार्य विभागाच्यावतीने जागतिक मूकनाट्य दिनाचे औचित्य साधून बुधवारी पहिल्यांदाच मूकनाट्यावर आधारित ‘मूकनाट्याविष्कार’चे आयोजन केले होते. लोकमान्य टिळक सभागृहात झालेल्या या कार्यक्रमात नागपुरातील पाच संस्था सहभागी झाल्या. कार्यक्रमाचे उद्घाटन गीत व नाट्य विभागाचे माजी उपसंचालक डॉ. नीलकांत कुलसंगे, सांस्कृतिक कार्य संचालनालयाचे विभागीय सहायक संचालक विराग सोनटक्के, सांस्कृतिक कार्य संचालनालयाचे माजी संचालक डॉ. सुधीर मेश्राम, ज्येष्ठ रंगकर्मी किशोर कुळकर्णी व महाराष्ट्र गांधी स्मारक निधीचे सचिव सुनील पाटील यांच्या प्रमुख उपस्थितीत पार पडले. ‘मूकनाट्यात विविध प्रयोग होणे आवश्यक आहे. मूकनाट्याचा नाटकांमध्ये वापर केल्यास ते अधिक सकस होईल. समाजाला राजकीय, सामाजिक, सांस्कृतिक स्थितीबद्दल जागरूक करायचे असेल तर रोजच्या जगण्याचे प्रश्न मूकनाट्याद्वारे समोर आले पाहिजे’, असे डॉ. कुलसंगे म्हणाले. उद्घाटन सोहळ्यानंतर डॉ. संयुक्ता थोरात फाउंडेशनच्यावतीने ‘मुक्ती’ हे स्त्री स्वातंत्र्यावरील मूकनाट्य सादर करण्यात आले. स्त्रीला आकांक्षांचे पंख ‌लावून आकाशात मुक्त संचार करण्याची इच्छा असली तरी पिलासाठी तिला जमिनीवर यावेच लागते, हे मूकनाट्यातून दर्शविण्यात आले.

वेलकम ग्रुपच्यावतीने ‘पाणी वाचवा’ हे मूकनाट्य सादर करण्यात आले. उत्तम संगीत, उत्तम मुकाभिनयाने नटलेल्या या नाटकात आपण पाण्याचा अपव्यय कसा करतो, पाण्याची नासाडी केल्याने भविष्यात कोणत्या संकटांना आपल्याला सामोरे जावे लागू शकते, याचे चित्र उभे केले. शील कलासागर बहुउद्देशीय संस्था, तन्मय बहुउद्देशीय संस्था, बहुजन रंगभूमी या संस्थांनीही यावेळी स्त्रीभ्रूणहत्या, दीव्यांग आदी विषयांवर मूकनाट्य सादर केले. सूत्रसंचालन सलीम शेख यांनी केले.