९० लाखांच्या जुन्या नोटांसह व्यापारी अटकेत

म. टा. वृत्तसेवा, अमरावती

कमिशनवर जुन्या बदलण्यासाठी अमरावतीत आलेल्या नागपूरच्या एका व्यावसायिकासह तिघांना अमरावती पोलिसांनी मंगळवारी सायंकाळी ९० लाख रुपयांसह अटक केली. अमित रामभाऊ वाकडे, पुष्पेंद्र मिश्रा (दोघेही रा. नागपूर) आणि संदीप गायधने अशी अटकेतील आरोपींची नावे आहेत.

अमितचा कॉटन गाठी विक्रीचा व्यवसाय आहे. अमित हा कार क्रमांक एमएच ३१ डीके ५६५६ ने मोठ्या प्रमाणात चलनातून बाद झालेल्या जुन्या नोटा बदलविण्यासाठी अमरावतीत येत असल्याची माहिती विशेष शाखेतील सहायक पोल‌िस उपनिरीक्षक सुरेश देशमुख यांना मिळाली. शासकीय विश्रामभवन परिसरातील मध्यवर्ती कारागृह मार्गावर डिलिंग होणार असल्याचेही देशमुख यांना कळले होते. त्यानुसार गुन्हे शाखेचे पोलिस निरीक्षक प्रमेश आत्राम, विशेष शाखेच्या पोल‌िस निरीक्षक नीलिमा आरज, पोलीस उपनिरीक्षक आशिष देशमुख यांच्या नेतृत्वात पथकाने सापळा रचला. अमित आपल्या कारने मध्यवर्ती कारागृह मार्गावर दाखल होताच पोलिसांनी त्याला थांबवले. चौकशीदरम्यान आपण नातेवाईकांकडे आलो असल्याचे त्याने सांगितले. मात्र, तो नातेवाईकांचे नाव सांगू शकला नाही. झडती घेतली असता त्यात अमितकडे पाचशे व एक हजार रुपयांच्या चलनातून बाद झालेल्या जुन्या नोटा सापडल्या. पोलिसांनी अमितसह, इतर दोघांना ताब्यात घेऊन पुढील तपास सुरू केला.