पोषण आहाराची आज झाडाझडती

नागपूर : अनेक शाळांमध्ये पोषण आहार योग्य त्या प्रमाणात दिला जात नसल्याच्या तसेच कित्येक ठिकाणी अद्याप पुरेशी साधन सामग्री पोहोचली नसल्याच्या तक्रारी येऊ लागल्यानंतर आता शिक्षण विभागाने या विषयाची झाडाझडती घेण्याचे ठरवले आहे. या विषयासंदर्भात जिल्ह्याची माहिती घेण्यासाठी मुख्य कार्यकारी अधिकारी आणि प्राथमिक शिक्षणाधिकारी यांच्या उपस्थितीत विशेष बैठक घेतली जाणार आहे.

शाळांच्या नव्या सत्राला सुरुवात होऊन एक महिना झाल्यानंतरदेखील अद्याप अनेक शाळांमध्ये पोषण आहाराची सामग्री पोहोचली नसल्याच्या तक्रारी गेल्या काही दिवसांपासून पुढे येत आहे. जिल्ह्याच्या पोषण आहार विभागाकडे सामग्री उपलब्ध असतानाही शाळांकडे ते साहित्य पोहोचलेले नाही. वारंवार मागणी करूनही जिल्हा परिषदेकडून हे साहित्य पुरवले गेले नसल्याचे शाळांचे म्हणणे आहे. या पार्श्वभूमीवर प्राथमिक शिक्षणा‌धिकाऱ्यांनी विशेष सभा सोमवारी बोलविली आहे. जिल्हा परिषदेच्या मुख्य कार्यकारी अ‌धिकाऱ्यांच्या कक्षात ही बैठक २५ जुलै रोजी होणार आहे. सर्व पंचायत समितींच्या शालेय पोषण आहार अधीक्षकांनी या बैठकला स्वतः उपस्थित राहावे व आपला प्रतिनिधी पाठवू नये, अशा सूचना देण्यात आल्या आहेत.

या बैठकीमध्ये पंचायत समितीमध्ये तांदूळ व अन्य मालाच्या पुरवठ्याची सद्यस्थिती, शाळांना व्यवस्थित पुरवठा होण्यासाठी केलेली कार्यवाही तसेच खुल्या बाजारातून खरेदीबाबत केलेली कार्यवाही आदी माहिती सादर करावी लागणार आहे. याशिवाय, तयार आहार व आणि इतर मालाच्या प्रयोगशाळा पडताळणीबाबत पंचायत समिती स्तरावरून काय केले गेले, पोषण आहार योजनेबाबत आलेल्या तक्रारी आणि त्यासंदर्भात केलेली कार्यवाही तसेच सरलच्या संकेतस्थळावर शाळांनी भरलेल्या माहितीचा तालुकानिहाय अहवाल घेऊन अधीक्षकांनी बैठकीला यावे, अशाही सूचना प्राथमिक शिक्षणाधिकाऱ्यांनी दिल्या आहेत.