रेल्वे स्थानकावर पार्किंगचे दर दुप्पट

म. टा. विशेष प्रतिनिधी, नागपूर

रेल्वे स्थानकावर संत्रा मार्केटच्या बाजूने असलेल्या वाहन तळावर पार्किंगचे दर दुप्पट करण्यात आल्याने वाहन चालकांमध्ये असंतोष आहे.

येथील पार्किंगचे कंत्राट अलीकडेच नव्याने देण्यात आले आहे. त्यातील नवे दर सर्वसामान्य वाहनचालकांवर अन्याय करणारे असल्याची प्रवाशांची भावना आहे. संत्रा मार्केटकडील पार्किंगचा कंत्राटदार जुलै २०१६ मध्येच हे कंत्राट सोडून गेला होता. त्यामुळे रेल्वे प्रशासन स्वतःच ही व्यवस्था पाहात होते. जुलै २०१६ ते मार्च २०१७ अशी नऊ महिने ही जबबादरी रेल्वे प्रशासनाने सांभाळली. आता पार्किंगचे नवे कंत्राट देण्यात आले आहे मात्र त्यात दर दुप्पट करण्यात आले आहे. पूर्वी ६ तासांसाठी ५ रुपये लागायचे आता ८ तासांसाठी १० रु. द्यावे लागत आहेत. वास्तविक स्थानकावर कुणीही तीन तासांपेक्षा अधिक काळासाठी जात नाही. विशेष म्हणजे प्लॅटफॉर्म तिकीट कमीत कमी ३ तासांचे दिले जाते पण पार्किंग मात्र कमीत कमी ८ तासांचे करावे लागते ही विसंगती का, हा प्रश्नच आहे.

त्यामुळे पार्किंगची वेळ कमीत कमी ३ तासांची असावी, अशी मागणी माहिती अधिकार कार्यकर्ते अविनाश प्रभुणे यांनी केली आहे. त्याचप्रमाणे मासिक पासधारकांसाठीचे दरही दुप्पट झाले आहेत. मासिक पासधारकांना आधी १६० रु. भरावे लागायचे. ते आता ३०० रुपये करण्यात आले आहे. सर्व सरकारी कार्यालयांना माफक दरात तेथे येणाऱ्यांना पार्किंग सुविधा द्यावी लागते. मग रेल्वेला हा नियम लागू नाही काय? असा प्रश्न आहे. रेल्वे स्थानकावर कुणीही मनोरंजानासाठी येत नाही. जे लोक येतात ते प्रवासासाठी किंवा प्रवाशांसोबत येतात. त्यामुळे त्याना पर्किंग व्यवस्था माफक दरात पुरविणे रेल्वेची जबाबदारी आहे. येथील पार्किंग ना नफा ना तोटा तत्त्वावर चालविण्याची मागणीही प्रभुणे यांनी केली असून, तसे पत्र मध्य रेल्वेच्या नागपूर विभाग व्यवस्थापकांना दिले आहे.