पेंचच्या सफारीत जिप्सीच धावणार

mandar.moroney@timesgroup.com
Twitter: @MandarMoroneyMT

नागपूर ः नागपूरलगत असलेल्या पेंच व्याघ्र प्रकल्पामध्ये सफारी करावयाची असल्यास पर्यटकांना फक्त वन विभागाने नेमून दिलेल्या जिप्सींचाच वापर करावा लागणार आहे. खासगी वाहनाने जंगलात सफारीसाठी जाण्यास आता प्रकल्प प्रशासनाने बंदी घातली आहे.

ताडोबा आणि उमरेड-कऱ्हांडलापाठोपाठ सिल्लारी येथून होणारी पेंच व्याघ्र प्रकल्पातील जंगलसफारी अलीकडे लोकप्रिय होऊ लागली आहे. या भागात वन विभागाने पर्यटकांना विविध सुविधा देण्याच्या दृष्टीनेही प्रयत्न केले आहे. त्यामुळे, सिल्लारी प्रवेशद्वारातून पेंचमध्ये सफारीला जाणाऱ्या पर्यटकांची संख्या आणि त्यामुळे वनखात्याला मिळणारा महसूल यांच्यात वाढ झाली आहे. या सफारीसाठी आजवर जिप्सींसह खासगी वाहनांनादेखील प्रवेश दिला जात असे. आपले वाहन घेऊन पर्यटकांना पेंच प्रकल्पात सफारी करता येत असे. मात्र, वन विभागाने आता हा पर्याय हा संपुष्टात आणला आहे.

पावसाळ्याच्या काळात व्याघ्र प्रकल्पाच्या कोअर भागातील सफारी पूर्णपणे बंद करण्यात आली होती. या काळात पर्यटकांना केवळ बफर भागातच फिरण्याची परवानगी होती. १६ ऑक्टोबरपासून पुन्हा एकदा पूर्ण सफारीला प्रारंभ करण्यात आला आहे. मात्र, असे करताना पेंच व्याघ्र प्रकल्पाने खासगी वाहनांना सफारीसाठी नेण्यास मनाई करण्यात आली आहे. सिल्लारी प्रवेशद्वारातून आता फक्त वनखात्याने मान्यता दिलेल्या जिप्सींनाच सफारीसाठी परवानगी दिली जाणार आहे. इतर ठिकाणांहून मात्र खासगी वाहनेदेखील जाऊ शकतील, असे वन विभागातील सूत्रांनी सांगितले.

स्थानिकांच्या लाभासाठी नवा निर्णय

सिल्लारी येथून जाणाऱ्या जिप्सी या पेंच प्रकल्पाच्या आजूबाजूच्या गावांमधील लोकांच्याच राहणार आहेत. या सफारीसाठी जाणाऱ्या चालकांची नोंदणीही वन विभागाने केली आहे. त्याचप्रमाणे गाडीबरोबर जाणाऱ्या गाइडसलाही प्रशिक्षण देण्यात आले आहे. केवळ जिप्सी आत जाऊ देण्याच्या निर्णयामुळे स्थानिकांना जास्त रोजगार मिळू शकेल. त्याचप्रमाणे, व्याघ्रप्रकल्पात नियमांचे उल्लंघन होण्यासारख्या घटनांवरदेखील नियंत्रण आणता येणार आहे. कारमध्ये फिरल्याने सफारीचा पूर्ण आनंद घेणेही शक्य नसते. त्यामुळे, जिप्सींनाच परवानगी देण्याचा हा निर्णय वने, स्थान‌‌िक आणि पर्यटक अशा तिघांच्याही लाभाचा राहणार असल्याचे मत वन परिक्षेत्र अधिकारी अतुल देवकर यांनी व्यक्त केले.