प्रवीण दटके भाजयुमोचे राष्ट्रीय उपाध्यक्ष

नागपूर : भारतीय जनता युवा मोर्चातर्फे मंगळवारी नव्या कार्यकारिणीची घोषणा करण्यात आली. यात माजी महापौर आणि विद्यमान भाजपचे नगरसेवक प्रवीण दटके यांची राष्ट्रीय कार्यकारिणीच्या उपाध्यक्षपदी नियुक्ती करण्यात आली आहे.

अध्यक्ष पूनम महाजन यांनी मंगळवारी नवी दिल्ली येथे ही घोषणा केली. यात एकूण ३७ पदाधिकारी, तर ४४ सदस्यांचा समावेश आहे. दटके यांच्याखेरीज महाराष्ट्रातील अन्य तिघांचा पदाधिकाऱ्यांमध्ये समावेश आहे. यात रक्षा खडसे, देवांग दवे आणि सिद्धार्थ शिरोळे यांचा समावेश आहे. रक्षा यांचा सांस्कृतिक समितीची, देवांग यांना आयटी विभागाची, तर सिद्धार्थ यांना अर्थ समितीची जबाबदारी देण्यात आली आहे. महाजन यांच्या कार्यकारिणीत सात उपाध्यक्ष, दोन सरचिटणीस, आठ सचिव, २२ समित्यांचे प्रमुख आणि ४४ कार्यकारिणी सदस्यांचा समावेश आहे. भाजयुमो स्टडी सर्कल आणि प्रशिक्षण समितीचे प्रमुखपद पूनम महाजन यांनी स्वतःकडेच ठेवले आहे. दटके यांच्या या निवडीबद्दल भाजपच्या नागपूर कार्यकारिणीत आनंद व्यक्त होत आहे.