सायंटिफिक सोसायटीने बळकावला प्लॉट

नागपूर ः मौजा अजनी परिसरातील नासुप्रच्या मालकीचा प्लॉट सायंटिफिक सोसायटीने बळकावला असल्याची तक्रार नागपूर सुधार प्रन्यासने पोलिसांत केली आहे. बेकायदेशीर भूखंड बळकावल्याप्रकरणी गुन्हे दाखल करण्याची मागणी नासुप्रने केली आहे. पोलिसांकडून प्रतिसाद मिळत नसल्याने नासुप्रने स्मरणपत्र पाठवूनही पोलिसांचे लक्ष वेधले.

मौजा अजनी येथील सायंटिफिक को-ऑपरेटिव्ह हाउसिंग सोसायटीच्या विरोधात नागपूर सुधार प्रन्सासच्या पश्चिम विभागीय अधिकाऱ्यांनी धंतोली पोलिसात तक्रार दाखल केली आहे. नासुप्रच्यावतीने २२ फेब्रुवारी १९५१ रोजी हा विकास करारनाम्यानुसार खाजगी जमिनीवरील हा अभिन्यास मंजूर करण्यात आला आहे. या अभिन्यासातील ब्लॉक पी मधील भूखंड क्रमांक पी-३ व पी ४ जे. पी. बहोर यांना ४ जून १९५५ च्या विक्री पत्राद्वारे सोसायटीने विकला होता. हे दोन्ही भूखंड नासुप्रने जे. पी. बेहोर यांच्याकडून ८ जानेवारी १९६४ रोजी खरेदी केल्याचे नासुप्रच्या अभिलेखात नोंद आहे. हे दोन्ही भूखंड नासुप्रच्या मालकीचे असल्याचे सबळ पुरावे असतानाही सायंटिफिक सोसायटीने भूखंड क्रमांक पी ३ व पी ४ विक्री पत्राद्वारे मे. डिसेंट डेव्हलपर्स व संजय बड यांना ३१ ऑक्टोबर २००५ रोजी विकले असल्याचे उघडकीस आले. हे दोन्ही भूखंड नासुप्रच्या मालकीचे आहे. नासुप्रला अंधारात ठेऊन सायंटिफिक सोसायटीने हा बेकायदेशीर व्यवहार केला आहे. याप्रकरणी सायंटिफिक सोसायटीच्या दोषी पदाधिकाऱ्यांवर गुन्हे दाखल करून कारवाई करण्याची मागणी नासप्रकडून करण्यात आली आहे. धंतोली पोलिसांना याबातचे स्मरणपत्रही पाठविण्यात आले आहे.