‘श्रावणक्वीन’ स्पर्धेची उत्सुकता शिगेला

म. टा. प्रतिनिधी, नागपूर महाराष्ट्र टाइम्सची ‘श्रावणक्वीन’ स्पर्धा म्हणजे श्रावणात उमललेल्या सुंदर आणि टवटवीत फुलांसारखी असते. या स्पर्धेतील एकाहून एक सुंदर फुले निवडताना परीक्षकांची नेहमीच तारांबळ उडत असते. युवतींमधील सौंदर्य, बुद्धिमत्ता आणि विविध कलागुणांचा कस लावणारी ही पुण्या-मुंबईकडे प्रचंड लोकप्रिय ठरलेली स्पर्धा यंदापासून नागपुरातही आयोजित करण्यात येणार आहे.

श्रावण महिना हाच मुळात सौंदर्याने नटलेला महिना म्हणून ओळखला जातो. एकीकडे ऊन-पावसाचा खेळ रंगलेला असतो, तर दुसरीकडे सृष्टी हिरवा शालू ओढून नटून बसलेली असतो. महिलांसाठी श्रावण म्हणजे अत्यंत उत्साहाचा महिना मानला जातो. सणवारांनी भरगच्च भरलेल्या या महिन्यात घराघरात चैतन्याचा झरा वाहत असतो. अशा या प्रफुल्लित आणि उत्साही वातावरणात ‘मटा’ने नागपूरकर युवतींना ‘श्रावणक्वीन’ स्पर्धेच्या निमित्ताने ऑगस्ट महिन्यात आपले सौंदर्य पारखण्याची एक उत्तम संधी उपलब्ध करून देण्याचे ठरवले आहे.

मटाची ‘श्रावणक्वीन’ ही स्पर्धा जशी सौंदर्य, बुद्धिमत्ता आणि विविध कलागुणांचे प्रदर्शन करण्याची स्पर्धा आहे, तशीच ती सर्वच स्पर्धकांच्या आयुष्यात आमूलाग्र बदल घडविणारीदेखील आहे. मराठी चित्रपट, टीव्ही आणि थिएटरची कवाडे खुली करून देणाऱ्या या स्पर्धेने अनेक युवतींची स्वप्ने साकार केली आहेत. त्याचे ताजे उदाहरण म्हणजे मागील वर्षी ‘मटा श्रावणक्वीन’ स्पर्धेत सेकंड रनरअप ठरलेल्या रिचा अग्निहोत्री या तरुणीला दक्षिणेतून चित्रपटाची ऑफर आली आहे.

नागपूरकर युवतींनो सज्ज व्हा! लवकरच आम्ही नावे नोंदणी, स्पर्धेची तारीख, स्थळ, वेळ आदी या संदर्भात विस्तृत माहिती तुमच्यापर्यंत घेऊन येणार आहोत. या स्पर्धेसंदर्भात अधिक माहितीकरिता ०७१२-६६६०७०२ किंवा ०७१२-६६६०७५७ या क्रमांकांवर संपर्क साधावा.