भरचौकात वडिलांना जिवंत जाळले

नागपूर ः कौटुंबिक कलहातून मुलाने ‌व‌डिलाच्या अंगावर रॉकेल ओतून जिवंत जाळले. ही खळबळजनक घटना बेसा येथील शिवाजी चौकात घडली. वडिलाची प्रकृती चिंताजनक असून, त्यांच्यावर मेडिकलमध्ये उपचार सुरू आहेत.

राजेंद्र ऊर्फ राजू वसंतराव जिचकार (५६) असे जखमीचे तर त्यांचा मुलगा चंद्रशेखर ऊर्फ रॉकी व त्याचा मित्र नितिन उत्तम वाघाडे अशी आरोपींची नावे आहेत. दोघेही पसार आहेत. राजू हे वरुळमधील सावंगी येथील रहिवासी आहेत. ते शेती करतात. त्यांची दुसरी पत्नी मुलगा रॉकी याच्यासोबत बेसा भागात राहाते. रॉकी हा पेंटिंगचे काम करतो. राजू यांनी त्यांच्या पत्नीला घटस्फोटासाठी नोटीस पाठवली. बुधवारी ते नागपुरात आले. घटस्फोटाबाबत पत्नीसोबत बोलले. त्यानंतर त्यांनी

रॉकीसोबत चर्चा केली. रॉकी संतापला. त्यानंतर राजू हे वरुडला जाण्यासाठी घराबाहेर निघाले. रॉकी याने त्यांना थांबण्यास सांगितले. मात्र, राजू घराबाहेर गेले. त्यानंतर रॉकी याने त्याचा मित्र नितीन याला बोलाविले.

शिवाजी चौकात दोघांनी त्यांना मारहाण केली. अंगावर रॉकेल ओतून त्यांना जाळले. राजू यांनी आरडाओरड केली. राजू हे परिसरात एका पानठेल्याजवळ पडले. रामखिलावन यांनी आग विझवली. माहिती मिळताच हुडकेश्वर पोलिस पोहोचले. त्यांना मेडिकलमध्ये दाखल केले. या प्रकरणी पोलिसांनी प्राणघातक हल्ल्याचा गुन्हा दाखल करून दोघांचा शोध सुरू केला आहे.