‌संरक्षण क्षेत्रावर ३ ऑगस्टला विशेष सेमिनार

म.टा. प्रतिनिधी, नागपूर विदर्भाचा विकास साधायचा असल्यास येथील लघु व मध्यम उद्योजकांचा विकास आवश्यक आहे. हे लक्षात घेऊन विदर्भ इंडस्ट्रीज असोसिएशनतर्फे (व्हीआयए) विविध उपक्रमांच्या माध्यमातून पुढाकार घेण्यात येत आहे. याअंतर्गत ३ ऑगस्ट रोजी नागपुरात संरक्षण क्षेत्राशी संबंधित विषयावर महत्त्वाच्या सेमिनारचे आयोजन करण्यात आले आहे.

केंद्र आणि राज्याचे सत्ताकेंद्र नागपूर झाल्यापासून विदर्भातील उद्योग‌ विश्वात आगळी ऊर्जा निर्माण झाली आहे. यासाठीच व्हीआयए विविध प्रकारचा पुढाकार घेत आहे. काही महिन्यांपूर्वी विज्ञान भारतीसोबत संशोधने उद्योग क्षेत्रापर्यंत आणण्याचा प्रयत्न झाल्यानंतर आता येथील उद्योजकांसाठी संरक्षण क्षेत्राचे द्वार खुले करण्याचा प्रयत्न केला जाणार आहे. याअंतर्गत ३ ऑगस्ट रोजी हॉटेल सेंटर पॉइंट येथे हा सेमिनार होत आहे. नवी दिल्लीच्या संरक्षण संकल्पक व उद्योग असोसिएशनच्या (डीआयएए) सहकार्याने हा सेमिनार होत आहे. त्यामध्ये संरक्षण क्षेत्रातील मेक इन इंडियाच्यादृष्टीने लघु व मध्यम उद्योग क्षेत्रासाठी काय करता येईल? यावर विस्तृत चर्चा, सादरीकरण होणार आहे, अशी माहिती व्हीआयएचे अध्यक्ष अतुल पांडे, डीआयएएचे समन्वयक दुष्यंत देशपांडे व व्हीआयएचे सचिव डॉ. सुहास बुधे यांनी मंगळवारी पत्रपरिषदेत दिली.