शुल्क जमा करू न शकल्याने विद्यार्थ्याची आत्महत्या

नागपूर : पॉलिटेक्निकच्या अभ्यासक्रमाचे शुल्क जमा करू न शकल्याने १८ वर्षीय विद्यार्थ्याने गळफास घेऊन आत्महत्या केली. या घटनेने पालकांमध्ये प्रचंड खळबळ उडाली असून, शिक्षण शुल्काचा भस्मासूर आता विद्यार्थ्याच्या बळी घेत असल्याच्या संतप्त भावाना व्यक्त होत आहेत. शिवम अतुल जोशी (१८, रा. गरुड खांब) असे मृताचे नाव आहे.

अतुल जोशी यांचा फळविक्रीचा व्यवसाय आहे. शिवमची आई खासगी काम करते. शिवमला जुळी बहीण आहे. ती शिक्षण घेत आहे. शिवम याने पॉलिटेक्निकच्या अभ्यासक्रमाला प्रवेश घेतला होता. प्रशासनाने त्याला ६५ हजार रुपये शुल्क जमा करण्यास सांगितले. मात्र, वडिलांची आर्थिक परिस्थिती नसल्याने तो शुल्क जमा करू शकला नाही. तो हताश झाला होता. शाळेत जात नव्हता. अतुल यांनी त्याची समजूत घालून नाशिक येथे राहणाऱ्या आजोबांकडे पाठविले होते. काही दिवसांपूर्वी तो नागपुरात परतला. पॉलिटेक्निकचे शिक्षण शुल्क जमा करू शकत नसल्याने शाळा सोडल्याचा दाखला आणायला तो कॉलेजमध्ये गेला. संपूर्ण ६५ हजार रुपयांचे शुल्क जमा केल्याशिवाय शाळा सोडल्याचे प्रमाणपत्र देणार नाही, असे कॉलेज प्रशासनाने त्याला सांगितले. त्यामुळे तो आणखी हताश झाला. सोमवारी सकाळी शिवम याने पंख्याच्या हुकला साडी बांधून गळफास घेतला. १० वाजताच्या सुमारास ही घटना उघडकीस आली. शिवमच्या नातेवाइकांनी हंबरडा फोडला. शेजारी जमा झाले. कोतवाली पोलिस स्टेशनचे सहायक पोलिस निरीक्षक के. डी. वाघ व पोलिस तेथे पोहोचले. शुल्क माफ करण्यासाठी एका आमदाराने अतुल यांना पत्रही दिले होते.

१३ दिवसांपूर्वी मित्रानेही केली आत्महत्या
शिवमचा मित्र आकाश वसंता साबळे (२१, रा. एमआयजी क्वॉर्टर,नंदनवन) याने २७ सप्टेंबरला गळफास घेऊन आत्महत्या केली होती. सोमवारी त्याच्या मृत्यूला १३ दिवस झाले. आकाश याच्या मृत्यूमुळेही शिवम हताश झाला होता,असे पोलिसांनी सांगितले.