म.टा. विशेष प्रतिनिधी, नागपूर
एखाद्याने चोरी केल्यावर संबंधिताला त्याचा ऐवज मिळाला तर पोलिसांमार्फतच मिळू शकतो पण प्रत्यक्ष चोरच चोरलेला ऐवज परत आणून देईल, असे घडत नाही. त्यातही ऐवज मोठा असेल तर तो परत करण्यासाठी चोरच पुढाकार घेण्याची सूतराम शक्यता नाही. मात्र, तीन वर्षांपूर्वी एका महिलेचे ६० लाखांचे हिरे परत करून पसार होणारा एक चोर अलीकडेच नागपूर लोहमार्ग पोलिसांच्या जाळ्यात अडकला आहे. विनायक ऊर्फ विनोद वानखेडे (३५, महागाव जि. यवतमाळ) असे या चोराचे नाव आहे.
रेल्वे गाड्यांमध्ये चोऱ्या करणारा विनोद अट्टल चोर आहे. रेल्वेत चोऱ्यांचे अनेक गुन्हे त्याच्यावर दाखल आहेत आणि काही प्रकरणांमध्ये त्याला शिक्षाही झाली आहे. सोमवारी सायंकाळी लोखंडी पुलाजवळ गाडीतून उतरून जात असताना लोहमार्गचे दीपक डोर्लीकर यांनी सिनेस्टाइल पाठलाग करून त्याला पकडले होते. त्याच्या चौकशीत हे ६० लाखांचे हिऱ्याचे प्रकरण पुढे आले आहे. तीन वर्षांपूर्वी, चोराने हिरे परत करण्याच्या प्रकाराची जोरदार चर्चा झाली होती. मात्र, तो चोर कोण, हे पोलिसांना कळले नव्हते. आता विनोद हाच तो हिरे परत करणारा चोर असल्याचे स्पष्ट झाले आहे.
२०१३ साली ०१६५६ भोपाळ- चेन्नई ही विशेष गाडी नागपूर जिल्ह्यातील गुमगाव स्थानकावर थांबली असता सरोज रामपुरिया (इंदूर) या प्रवाशी महिलेची पर्स लांबवून विनोदने गाडीतून पळ काढला होता. या महिलेने त्याचवेळी नागपूरला लोहमार्ग पोलिसांत या चोरीची तक्रार दिली होती. पर्समध्ये ६० लाखांचे हिरे असल्याने पोलिसही आरोपीच्या शोधासाठी विशेष प्रयत्न करू लागले. दरम्यान, पर्स घेऊन पळालेल्या विनोदने जेव्हा पर्स उघडली तेव्हा त्यात हिरे असल्याचे पाहून तोही चक्रावला. आपण चोर असलो तरी इतके हिरे ‘पचवू’ शकणार नाही, याची त्याला कल्पना आली. सुदैवाने त्या पर्समध्ये त्या महिलेचा मोबाइल होता. विनोदने संबंधित महिलेशी फोनवर संपर्क साधून आपण पर्स चोरल्याचे, मात्र त्यातील हिरे आपल्याला परत करायचे असल्याचे सांगितले. पण, पोलिसांना सांगायचे नाही, अशी त्याची अट होती. चोराचाच असा फोन आल्याने त्या महिलेने लगेच लोहमार्ग पोलिसांना याबाबत माहिती दिली. मग सूचनेनुसार ती फोनवर विनोदशी बोलत राहिली.
हिरे देण्यासाठी सिव्हिल लाइन्समध्ये एक जागा निश्चित झाली आणि तेथे आपण पर्स ठेवू, असे त्याने सांगितले होते. महिलेने दिलेल्या माहितीनुसार पोलिसही त्याच्यावर पाळत ठेवून होते. पण, ऐनवेळी विनोदला शंका आली व त्याने सिव्हिल लाइन्समधील जागा बदलली आणि आता ही पर्स आपण सदरमधील एका बसथांब्यावर ठेवत असल्याचे सांगितले. त्यानुसार महिला त्या ठिकाणी गेली. तेथे ती पर्स ठेवलेली आढळली पण ठेवणारा मात्र पोलिसांच्या हाती लागला नाही. चोरी केलेली पर्स त्यातील हिऱ्यांसह ठेवणारा हा ‘सज्जन’ चोर कोण, हे गूढ पोलिसांना आजवर उकलले नव्हते. आता विनोदच्या अटकेमुळे ते उकलले आहे.
विनोद मुळात लष्करी जवान आहे. काही वर्षांतच त्याने लष्करातील नोकरी सोडली आणि पुण्यात एका खासगी कंपनीत काम करू लागला. त्याचदरम्यान त्याची एका चोराशी ओळख झाली आणि विनोदही मग रेल्वेत चोऱ्या करू लागला. त्याच्या घरी आई, तीन बहिणी, दोन भाऊ असा परिवार आहे. वर्धा येथील नऊ, तर पुण्याच्या सहा गुन्ह्यांमध्ये त्याला शिक्षा झाली आहे. एखाद्या गाडीत त्याला आरपीएफने हटकले तर आपण जीआरपीचे (लोहमार्ग) व जीआरपी जवानांनी हटकले तर आरपीएफमध्ये असल्याचे तो सांगायचा. रेल्वे स्थानकावरील हॉटेलमध्येही पोलिस असल्याचे सांगून तो फुकटात खायचा. असा हा ‘साहेब’ लोहमार्ग पोलिसांनी गजाआड केला आहे.
एखाद्याने चोरी केल्यावर संबंधिताला त्याचा ऐवज मिळाला तर पोलिसांमार्फतच मिळू शकतो पण प्रत्यक्ष चोरच चोरलेला ऐवज परत आणून देईल, असे घडत नाही. त्यातही ऐवज मोठा असेल तर तो परत करण्यासाठी चोरच पुढाकार घेण्याची सूतराम शक्यता नाही. मात्र, तीन वर्षांपूर्वी एका महिलेचे ६० लाखांचे हिरे परत करून पसार होणारा एक चोर अलीकडेच नागपूर लोहमार्ग पोलिसांच्या जाळ्यात अडकला आहे. विनायक ऊर्फ विनोद वानखेडे (३५, महागाव जि. यवतमाळ) असे या चोराचे नाव आहे.
रेल्वे गाड्यांमध्ये चोऱ्या करणारा विनोद अट्टल चोर आहे. रेल्वेत चोऱ्यांचे अनेक गुन्हे त्याच्यावर दाखल आहेत आणि काही प्रकरणांमध्ये त्याला शिक्षाही झाली आहे. सोमवारी सायंकाळी लोखंडी पुलाजवळ गाडीतून उतरून जात असताना लोहमार्गचे दीपक डोर्लीकर यांनी सिनेस्टाइल पाठलाग करून त्याला पकडले होते. त्याच्या चौकशीत हे ६० लाखांचे हिऱ्याचे प्रकरण पुढे आले आहे. तीन वर्षांपूर्वी, चोराने हिरे परत करण्याच्या प्रकाराची जोरदार चर्चा झाली होती. मात्र, तो चोर कोण, हे पोलिसांना कळले नव्हते. आता विनोद हाच तो हिरे परत करणारा चोर असल्याचे स्पष्ट झाले आहे.
२०१३ साली ०१६५६ भोपाळ- चेन्नई ही विशेष गाडी नागपूर जिल्ह्यातील गुमगाव स्थानकावर थांबली असता सरोज रामपुरिया (इंदूर) या प्रवाशी महिलेची पर्स लांबवून विनोदने गाडीतून पळ काढला होता. या महिलेने त्याचवेळी नागपूरला लोहमार्ग पोलिसांत या चोरीची तक्रार दिली होती. पर्समध्ये ६० लाखांचे हिरे असल्याने पोलिसही आरोपीच्या शोधासाठी विशेष प्रयत्न करू लागले. दरम्यान, पर्स घेऊन पळालेल्या विनोदने जेव्हा पर्स उघडली तेव्हा त्यात हिरे असल्याचे पाहून तोही चक्रावला. आपण चोर असलो तरी इतके हिरे ‘पचवू’ शकणार नाही, याची त्याला कल्पना आली. सुदैवाने त्या पर्समध्ये त्या महिलेचा मोबाइल होता. विनोदने संबंधित महिलेशी फोनवर संपर्क साधून आपण पर्स चोरल्याचे, मात्र त्यातील हिरे आपल्याला परत करायचे असल्याचे सांगितले. पण, पोलिसांना सांगायचे नाही, अशी त्याची अट होती. चोराचाच असा फोन आल्याने त्या महिलेने लगेच लोहमार्ग पोलिसांना याबाबत माहिती दिली. मग सूचनेनुसार ती फोनवर विनोदशी बोलत राहिली.
हिरे देण्यासाठी सिव्हिल लाइन्समध्ये एक जागा निश्चित झाली आणि तेथे आपण पर्स ठेवू, असे त्याने सांगितले होते. महिलेने दिलेल्या माहितीनुसार पोलिसही त्याच्यावर पाळत ठेवून होते. पण, ऐनवेळी विनोदला शंका आली व त्याने सिव्हिल लाइन्समधील जागा बदलली आणि आता ही पर्स आपण सदरमधील एका बसथांब्यावर ठेवत असल्याचे सांगितले. त्यानुसार महिला त्या ठिकाणी गेली. तेथे ती पर्स ठेवलेली आढळली पण ठेवणारा मात्र पोलिसांच्या हाती लागला नाही. चोरी केलेली पर्स त्यातील हिऱ्यांसह ठेवणारा हा ‘सज्जन’ चोर कोण, हे गूढ पोलिसांना आजवर उकलले नव्हते. आता विनोदच्या अटकेमुळे ते उकलले आहे.
विनोद मुळात लष्करी जवान आहे. काही वर्षांतच त्याने लष्करातील नोकरी सोडली आणि पुण्यात एका खासगी कंपनीत काम करू लागला. त्याचदरम्यान त्याची एका चोराशी ओळख झाली आणि विनोदही मग रेल्वेत चोऱ्या करू लागला. त्याच्या घरी आई, तीन बहिणी, दोन भाऊ असा परिवार आहे. वर्धा येथील नऊ, तर पुण्याच्या सहा गुन्ह्यांमध्ये त्याला शिक्षा झाली आहे. एखाद्या गाडीत त्याला आरपीएफने हटकले तर आपण जीआरपीचे (लोहमार्ग) व जीआरपी जवानांनी हटकले तर आरपीएफमध्ये असल्याचे तो सांगायचा. रेल्वे स्थानकावरील हॉटेलमध्येही पोलिस असल्याचे सांगून तो फुकटात खायचा. असा हा ‘साहेब’ लोहमार्ग पोलिसांनी गजाआड केला आहे.