मेयोला आणखी तीन कोटींचा निधी

म.टा. प्रतिनिधी, नागपूर

इंदिरा गांधी शासकीय वैद्यकीय महाविद्यालय व रुग्णालयाला (मेयो) राज्य सरकारने ११ व्या पंचवार्षिक योजनेंतर्गत पदव्युत्तर अभ्यासक्रमाच्या श्रेणीवर्धनासाठी तीन कोटी रुपयांचे अनुदान मंजूर केले आहे. या निधीमधून यंत्रसामग्री खरेदी केली जाणार असून याचा लाभ रुग्णांना होणार आहे.

गरीबच नाही तर सामान्यांसाठी आधार ठरलेल्या मेयो रुग्णालयाचा दिवसेंदिवस व्याप वाढत आहे. मेयोच्या पदव्युत्तर अभ्यासक्रमाच्या श्रेणीवर्धनासाठी मंजूर करण्यात आलेल्या २ कोटी ९९ लाख ६५ हजार ४२० एवढ्या रकमेची यंत्रसामुग्री खरेदी करण्यास प्रशासकीय मंजुरी दिली आहे. पदव्युत्तर अभ्यासक्रमाच्या श्रेणीवर्धनासाठी राज्यशासनाच्या २५ हिश्यांतर्गत हे अनुदान मंजूर झाले आहे. या निधीमधून १८ प्रकारचे विविध उपकरणे खरेदी केली जाणार आहेत. यात ४२ लाखांचे ‘२-डी इको कलर डॉप्लर’, विविध प्रकारचे आठ व्हेंटिलेटर, तीन लाखांचे ‘ब्लड सेल काऊंटर’, ३३ लाखांचे ‘क्रायोस्टॅट’, ३६ लाखांचे ‘अ‍ॅडव्हान्सड फेकोइमल्सिफिकेशन युनिट’, २३ लाखांचे ‘ऑप्टिकल कोहेरन्स टोमोग्राफी, १८ लाखांचे ‘पोर्टेबल सोनोग्राफी मशिन’ आदींचा समावेश आहे. या सर्व यंत्रांची खरेदी राज्यस्तरीय खरेदी समितीकडून होणार आहे.