म.टा.विशेष प्रतिनिधी, नागपूर
महाग झालेले उच्च शिक्षण आणि शिकवणी वर्ग ही वर्तमान शैक्षणिक व्यवस्थेसमोरील मोठी आव्हाने आहेत. त्यावर व्यापक चिंतन आणि उपाय करणे आवश्यक आहे, असे प्रतिपादन राष्ट्रीय प्राचार्य संघटनेचे अध्यक्ष डॉ. सुभाष ब्रह्मभट यांनी केले.
राष्ट्रसंत तुकडोजी महाराज नागपूर विद्यापीठ प्राचार्य फोरम, धनवटे नॅशनल कॉलेज यांच्या संयुक्त विद्यमाने आयोजित ३७ व्या राज्यस्तरीय प्राचार्य महासंघाचे उद्घाटन रविवारी झाले. त्यावेळी डॉ. ब्रह्मभट बोलत होते. या दोन दिवसीय अधिवेशनाचे उद्घाटन ऊर्जामंत्री व नागपूरचे पालकमंत्री चंद्रशेखर बावनकुळे यांच्या हस्ते झाले. कार्यक्रमाच्या अध्यक्षस्थानी श्री शिवाजी शिक्षण संस्थेचे अध्यक्ष अॅड. अरुणकुमार शेळके होते. तर विशेष अतिथी म्हणून आमदार सुनील केदार, उच्च व तंत्रशिक्षण संचालक डॉ. धनराज माने, नॅकचे समनवयक डॉ. जगन्नाथ पाटील, मुंबई विद्यापीठाचे माजी कुलगुरू डॉ. राजन वेळूकर, प्राचार्य डॉ. बबनराव तायवाडे, शिक्षण सहसंचालक अंजली रहाटगावकर, महादेव भुईभार, हरिभाऊ ठाकरे उपस्थित होते.
ब्रिटिशांनी भारतीय शिक्षणपद्धत मोडून काढली. आता सक्षम राष्ट्र निर्मितीसाठी शैक्षणिक क्षेत्रात परिवर्तन करणे आवश्यक आहे. विशेषतः युवकांना घडविणारी शैक्षणिक पद्धत विकसित करायला हवी, असे डॉ. ब्रह्मभट यांनी नमूद केले.
या अधिवेशनाचे उद्घाटन ऊजामंत्री चंद्रशेखर बावनकुळे यांनी केले. कौशल्यविकास ही काळाची गरज आहे. उत्कर्षासाठी क्रांती होणे आवश्यक आहे, असे त्यांनी नमूद केले. तसेच सर्व शैक्षणिक संस्थांनी सौरऊर्जा प्रकल्प लावण्याचे आवाहन केले.
राजकीय सत्ता कोणतीही असो कोणताही भेदभाव न बाळगता गुणवत्तापूर्ण शिक्षणाची कास धरली पाहिजे. शिक्षणाचा दर्जा खालावला तर नवीन पिढी गारद होईल, असे आमदार केदार म्हणाले. तर उच्चशिक्षण संचालक डॉ. धनराज माने यांनी गुणात्मक की संख्यात्मक शिक्षण हवे, यावर खुलेपणाने चर्चा करणे आवश्यक असल्याचे मत मांडले. शिक्षणव्यवस्थेत स्थानिक गरजा आणि जागतिक पातळीवरचा विचार व्हायला हवा, असे माने म्हणाले.वर्तमान शैक्षणिक व्यवस्थेवर चिंता व्यक्त करताना अॅड. अरुणकुमार शेळके यांनी सुसंस्कृत, चारित्र्यवान, स्वावलंबी आणि देशभक्त पिढी निर्माण करण्याचे ध्येय शिक्षण व्यवस्थेसमोर असावे, अशी अपेक्षा व्यक्त केली. कार्यक्रमाचे प्रास्ताविक सादर करताना प्राचार्य डॉ. बबनराव तायवाडे यांनी संघटनेच्या गेल्या ४० वर्षांच्या कार्याचा आढावा सादर केला. ‘उच्चशिक्षणासमोरील आव्हाने आणि समस्या’ यावर संघटनेच्या माध्यमाने व्यापक चर्च होणार आहे. तसेच त्यामाध्यमाने गुणवत्ता व दर्जावाढीसाठी आवश्यक शिफारशीदेखील करण्यात येणार असल्याचे डॉ. तायवाडे यांनी नमूद केले. यावेळी स्मरणिकेचे प्रकाशन करण्यात आले. अहवालवाचन व्ही. आर. पाटील यांनी केले.
--जावडेकरांचा व्हिडीओ संदेश
यावळी केंद्रीय मानवसंसाधनमंत्री प्रकाश जावडेकरांची शुभेच्छापर चित्रफीत दाखविण्यात आली. त्यात जावडेकर यांनी अधिवेशन केवळ मागण्यांसाठी नसून गुणवत्ता वाढविण्यासाठी आयोजित केल्याबद्दल आयोजकांचे अभिनंदन केले. या अधिवेशनात शिक्षणाचा व शिक्षणक्षेत्राचा चहूबाजूंनी विचार करावा, अशी अपेक्षा व्यक्त केली.