​ वाहतुकीचा ‘ई’ घोळ

avinash.mahajan@timesgroup.com Twitter:@avinashRMMT
नागपूर : पोलिस आयुक्त डॉ. के. व्यंकटेशम यांनी पदभार स्वीकारताच नागपुरातील अस्ताव्यस्त वाहतूक मार्गावर आण्यासाठी प्रयत्न चालविले. त्यांच्या प्रयत्नांना बऱ्याच प्रमाणात यश आले. हेल्मेट घालणाऱ्या वाहनचालकांचा टक्का २० वरून थेट ८० टक्क्यांवर पोहोचला. वाहनचालकांसोबत वाहतूक पोलिसांचा होणारा वाद व पोलिसांवर होणारे आरोप टाळण्यासाठी व्यंकटेशम यांनी हेल्मेट न घालणाऱ्या व वाहतूक नियम तोडणाऱ्या वाहनचालकांचे ई चालान करायला सुरुवात केली. त्यासाठी वाहतूक पोलिसांना मोबाइल व कॅमेरेही देण्यात आले. वाहतूक पोलिस मात्र स्मार्ट झालेले दिसत नाहीत. एकाच व्यक्तीला एकाच वेळी दोन वेगवेगळया वाहनांचे ई चालान पाठविण्यात आल्याची धक्कादायक घटना उघडकीस आली आहे.

अशाप्रकारच्या या घोळाने खरचं वाहतूक पोलिस स्मार्ट होतील का? असा प्रश्न उपस्थित करण्यात येत आहे.३ नोव्हेंबरला एसबीआय कॉलनी येथील वर्धमान मोहेकर हे मोटरसायकलने (एमएच-३१-सीई-७९२७) जात होते. त्यांनी हेल्मेट घातले नव्हते. हिंगणा टी पॉइंट येथे तैनात वाहतूक पोलिसाने त्यांचे मोबाइलमधून छायाचित्र काढले. ३ डिसेंबरला त्यांना दोन चालान मिळाले. एका चालानमध्ये त्यांचे छायाचित्र व पत्ता होता. तर दुसऱ्या चालानमध्ये एका तरुणीचे छायाचित्र असून, पत्ता मात्र वर्धमान यांचाच आहे. एकाच वेळी दोन चालान आल्याने त्यांना धक्का बसला. दुसऱ्या चालानचे करायचे काय? असा प्रश्नही त्यांना पडला आहे.

चालानचा जावक क्रमांकही एकच!

वर्धमान मोहकर यांना वाहतूक शाखेच्या चेम्बर एक (एमआयडीसी) मधून ई चालान पाठविण्यात आले आहे. एका चालानचा जावक क्रमांक ३९२2२०१६ आहे. तर दुसऱ्याही चालानचा हाच जावक क्रमांक आहे. केवळ एका चालानवर ५२ तर दुसऱ्यावर ५३ क्रमांक आहे.