यूएलसी : ५० लाखांचा दंड

नागपूर : परवडणाऱ्या घरांसाठी राखीव ठेवण्यात आलेल्या वर्धा मार्गावरील रॅडिसन ब्ल्यू हॉटेलच्या मागच्या भूखंडाचा गैरवापर होत असल्याच्या कारणावरून जिल्हाप्रशासनाने जमीन मालक राजाराम वसंत धनवटे यांना ४९ लाख ९७ हजार ८०३ रुपयांचा दंड ठोठावला. या जागेवर तळेगाव दाभाडे विशेष भूखंड योजना मंजूर असून जागेचा दुरूपयोग करू नका अशा सक्त सूचना देत येत्या सात दिवसांत दंड भरण्याचे आदेश देण्यात आले आहे. ‘मटा’ने या विषयाचा पाठपुरावा केला होता.

नागपूर शहरातील मौजा सोमलवाडा येथील सर्व्हे क्र. ३२/२, ३२/३, ३७/१- क मध्ये नागरी जमीन कमाल धारणा अधिनियम १९७६ अंतर्गत तळेगाव दाभाडे भूखंड विकास योजना २१ एप्रिल २००३ रोजी मंजूर करण्यात आली. या अतिरिक्त ठरविण्यात आलेल्या जमिनीवर तळेगाव दाभाळे योजनेंतर्गत लेआउट पाडून किंवा गृहबांधणी करून गरिबांना घरे उपलब्ध करून देणे हा उद्देश होता. मात्र, गृहबांधणी प्रकल्प न उभारता या जागेचा दुरुपयोग सुरू असल्याची बाब उघड झाली होती. नागरी जमीन कमाल धारणा (यूएलसी) विभागाचे सक्षम प्राधिकारी अधिकारी यांच्या नेतृत्वात ८ मे २०१५ रोजी या जागेचा पंचनामा करण्यात आला होता. या जागेवर लॉन थाटण्यात आल्याचे जिल्हा प्रशासनाच्या निदर्शनास आले होते.

भूखंडाची करा मोजणी

गृहबांधणी प्रकल्पाच्या जागेचा व्यावसायिक वापर होत असल्याच्या कारणावरून संजय अग्रवाल यांना नोटीस पाठविण्यात आली होती. या जागेचा वाणिज्य वापर होत नसल्याचे अग्रवाल यांनी आपल्या उत्तरात कळविले होते. त्यामुळे भूखंडाच्या वापराची माहिती काढण्यासाठी जमिनीची मोजणी करून मोजणीची क प्रत जिल्हा प्रशासनाकडे सादर करण्याचेही आदेश देण्यात आले आहे. या जागेवर तळेगाव दाभाडे योजनाच राबवायची आहे. योजना राबविण्यास विलंब केल्यामुळे दंड म्हणून त्वरित ४९ लाख ९७ हजार ८०३ रुपये भरण्याची नोटीस देण्यात आली आहे. २०१५ मध्ये संजय अग्रवाल यांना नोटीस देण्यात आली होती. मात्र हा भूखंड राजाराम वसंत धनवटे यांच्या नावे आहे. त्यामुळे धनवटे यांच्या नावाने ही दंडाची नोटीस पाठविण्यात आली आहे.